پرویز الہٰی نے شریف برادران کو ملک میں مہنگائی کا ذمہ دار قرار دے دیا

سابق وزیراعلیٰ کی کمرہ عدالت میں صحافیوں سے غیر رسمی گفتگو، نواز شریف اور شہباز شریف نے آئی ایم ایف سے غلط شرائط پر قرضے لیے، ابھی پریس کانفرنس کرنے کا وقت نہیں آیا، افغانستان جیسا ملک پاکستان سے آگے جا رہا ہے۔ 

لاہور: (نیوز ڈیسک) پاکستان تحریک انصاف کے صدر اور سابق وزیراعلیٰ پنجاب چوہدری پرویز الہیٰ کا کہنا ہے کہ ملک میں مہنگائی کے ذمہ دار شریف برادران ہیں۔ عدالت میں پیشی کے دوران کمرہ عدالت میں چوہدری پرویز الہیٰ نے صحافیوں سے غیر رسمی گفتگو کرتے ہوئے کہا کہ ابھی پریس کانفرنس کرنے کا وقت نہیں آیا۔ سابق وزیراعلیٰ پنجاب نے اپنی گفتگو میں کہا کہ شہباز شریف اور نواز شریف نے آئی ایم ایف سے غلط شرائط پر قرضے لیے۔ انہوں نے کہا کہ ملک میں بے روزگاری مزید بڑھنے کا خدشہ ہے، افغانستان جیسا ملک پاکستان سے زیادہ ترقی کر رہا ہے۔ 

ایک صحافی کے سوال کے جواب پر پرویز الہیٰ نے کہا کہ ابھی میرا پریس کانفرنس کرنے کا کوئی ارادہ نہیں۔ دوسری جانب عدالت نے چوہدری پرویز الہیٰ کے جسمانی ریمانڈ کی استدعا مسترد کر دی ہے۔ اینٹی کرپشن پنجاب نے عدالت سے پرویز الہٰی کے مزید جسمانی ریمانڈ کی درخواست کی تھی۔ عدالت نے پی ٹی آئی کے صدر کو جوڈیشل ریمانڈ پر جیل بھیج دیا ہے۔ عدالتی حکم کے مطابق پاکستان تحریک انصاف کے صدر چوہدری پرویز الہیٰ کو اڈیالہ جیل راولپنڈی منتقل کیا جائے گا۔ 

خیال رہے کہ چوہدری پرویز الہیٰ پر اختیارات کا ناجائز استعمال کرنے کے 2 مقدمات درج کیے گئے ہیں۔ ان پر الزام عائد کیا گیا ہے کہ انہوں نے پنجاب اسمبلی میں بھرتیوں پر اختیارات کا غیر قانونی استعمال کیا اور محمد خان بھٹی کو پرنسپل سیکریٹری تعینات کرنے میں اختیارات سے تجاوز کیا۔ اینٹی کرپشن نے دونوں مقدمات میں 14 روزہ جسمانی ریمانڈ کی استدعا کی تھی جس پر جوڈیشل مجسٹریٹ عمران عابد نے محفوظ فیصلہ سنا دیا۔ پرویز الہٰی کے وکلا نے کہا کہ انہیں عدالت نے جوڈیشل کر دیا ہے۔