کرپٹ پولیس اہلکاروں کا اسپیشل کورٹ مارشل ہوگا: وزیراعلیٰ پنجاب
کرپٹ پولیس اہلکاروں کا اسپیشل کورٹ مارشل ہوگا، جرائم کےخلاف فنکشنل اسپیشلائزڈ پولیس فورس قائم کرنےکا فیصلہ، پنجاب کے ہر شہری کا تحفظ حکومت کی بنیادی ذمہ داری ہے: وزیراعلیٰ پنجاب
مری: (قومی ڈیسک) وزیراعلیٰ پنجاب مریم نواز کی زیر صدارت مری میں ہونے والے خصوصی اجلاس میں عورتوں اور بچوں سے زیادتی کے مقدمات میں سزائے موت کےلیے قانون سازی کا فیصلہ کیا گیا۔ اجلاس میں پنجاب میں امن و امان کی صورتحال کا تفصیلی جائزہ بھی لیا گیا، اجلاس میں سینئر وزیر مریم اورنگزیب، چیف سیکریٹری، سیکریٹری داخلہ نے بھی شرکت کی۔اعلامیے کے مطابق اجلاس میں آئی جی پنجاب نے صوبے میں امن و امان کی مجموعی صورت حال پر بریفنگ دی، اجلاس میں عوام کے جان و مال کے تحفظ کےلیے اقدامات کے لیےتجاویز اور سفارشات پیش کی گئیں۔
اجلاس میں پولیس میں کرپشن اور غیر پیشہ ورانہ رویے کی نشاندہی کے لیے اسپیشل آڈٹ سسٹم نافذ کرنے کی منظوری بھی دی گئی، جبکہ اجلاس میں یہ بھی فیصلہ کیا گیا کہ کرپٹ اور مجرموں سے ساز باز کرنے والے پولیس افسران اور اہلکاروں کا اسپیشل کورٹ مارشل ہوگا۔ اعلامیے کے مطابق رشوت مانگنے پر سی ایم کے اسپیشل ڈیش بورڈ پر شکایت درج ہو سکے گی، اسمگلنگ روکنے کےلیے بارڈر سیکیورٹی فورسز قائم کرنے کی تجویز پر غور کیا گیا، جرائم کےخلاف فنکشنل اسپیشلائزڈ پولیس فورس قائم کرنے کا فیصلہ کیا گیا ہے۔
وزیر اعلیٰ پنجاب نے کہا کہ سزا یقینی بنا کر جرائم میں کمی یقنی بنائی جاسکتی ہے، بچوں اور عورتوں سے زیادتی کے مقدمات میں ملوث افراد کو کیفر کردار تک پہنچا یا جائے، پنجاب کے ہر شہری کا تحفظ حکومت کی بنیادی ذمہ داری ہے۔ مریم نواز نے کہا کہ پولیس کو جدید اسلحہ، آلات گاڑیاں نائٹ ویژن اور ڈرون فراہم کریں گے، دہشت گردی، اسمگلنگ اور گینگز کے مستقل خاتمے کےلیے موثر کارروائی یقینی بنائی جائے، پراسیکیوشن اور انوسٹی گیشن کے سسٹم میں بہتری کی ضرورت ہے۔