*پاکستان سے تعلقات امریکا کے لیے بھی ضروری ہیں، مارکو روبیو*

واشنگٹن: (ویب ڈیسک) امریکی وزیر خارجہ مارکو روبیو نے کہا ہے کہ امریکا دنیا میں کہیں بھی ہونے والی دہشت گردی کے خلاف ہے اور ہر اس شخص یا ملک کی مخالفت کرتا ہے جو دہشت گردی کی سرپرستی کرتا ہے۔ بھارتی میڈیا کو انٹرویو دیتے ہوئے انہوں نے کہا کہ امریکا کے پاکستان کے ساتھ تعلقات ہیں اور جغرافیائی اعتبار سے ان تعلقات کو برقرار رکھنا ضروری ہے۔

مارکو روبیو کا کہنا تھا کہ جس طرح بھارتی حکومت کو ایران کے ساتھ تعلقات قائم رکھنے کی ضرورت ہے اور وہ ایرانی رہنماؤں سے ملاقاتیں کرتی ہے، اسی طرح امریکا کے لیے بھی پاکستان کے ساتھ تعلقات برقرار رکھنا اہم ہے۔ ان کے مطابق مختلف ممالک کے ساتھ تعلقات اور رابطے برقرار رکھنا سفارتی ضرورت ہے، چاہے بعض معاملات پر اختلافات موجود ہوں۔

امریکی وزیر خارجہ نے مزید کہا کہ پاکستان کے ساتھ بات چیت امریکا کے لیے مددگار ثابت ہو سکتی ہے۔ ان کا کہنا تھا کہ ممکن ہے پاکستان کے ساتھ تعلقات کے ذریعے امریکا بھارت کو لاحق خدشات دور کرنے میں اپنا کردار ادا کر سکے۔ ان کے بیان سے ظاہر ہوتا ہے کہ واشنگٹن پاکستان کے ساتھ روابط کو خطے کے معاملات اور بھارت کے تحفظات کے تناظر میں بھی اہمیت دیتا ہے۔

International News
#21stOct2026
#Pakistan
#USA
#MarcoRubio
#India
#Iran
#Diplomacy
#Terrorism
#TVN
#News
#TVNUrdu
#TVNWorld
#TheViewsNetwork