معروف برانڈز کی پانچ ادویات کے بیچز جعلی قرار، ڈریپ کا الرٹ جاری

اسلام آباد: (ویب ڈیسک) ڈرگ ریگولیٹری اتھارٹی پاکستان (ڈریپ) نے معروف برانڈز کے نام پر فروخت ہونے والی پانچ ادویات کے مخصوص بیچز کو جعلی قرار دیے جانے کے بعد ملک گیر الرٹ جاری کر دیا ہے۔ یہ کارروائی ڈرگ انسپکٹرز اور ڈرگ ٹیسٹنگ لیبارٹری کی جانچ کے بعد عمل میں لائی گئی۔ حکام نے متعلقہ ادویات کی فروخت روکنے اور مارکیٹ سے متاثرہ بیچز فوری طور پر ضبط کرنے کی ہدایت کی ہے۔

رپورٹ کے مطابق معدے کی جلن اور تیزابیت کے لیے استعمال ہونے والے میوکین سیرپ، الرجی کے علاج کے لیے نیزومٹ ناک کے اسپرے کے بیچ نمبر FW 099 اور نوسپا فورٹ 80 ملی گرام کے بیچ نمبر AN010 کو جعلی قرار دیا گیا ہے۔ اس کے علاوہ اینٹی بائیوٹکس آگمنٹین اور ویلوسیف کے نمونے بھی جعلی پائے گئے۔ لیبارٹری جانچ کے دوران نمونوں میں متعلقہ ادویات کے بنیادی فعال اجزا کی تصدیق نہیں ہو سکی۔

ڈریپ نے صوبائی ڈرگ حکام اور متعلقہ فیلڈ فورس کو ہنگامی اقدامات کی ہدایت کرتے ہوئے جعلی ادویات کی تیاری اور فروخت میں ملوث عناصر کے خلاف قانونی کارروائی کا حکم دیا ہے۔ حکام کے مطابق ان ادویات کا استعمال صحت کے لیے سنگین خطرہ بن سکتا ہے۔ شہریوں کو چاہیے کہ مذکورہ ادویات کے متعلقہ بیچز استعمال کرنے سے پہلے ڈاکٹر یا فارماسسٹ سے رہنمائی لیں اور کسی مشتبہ دوا کی اطلاع متعلقہ ڈرگ کنٹرول حکام کو دیں۔