’انڈیا آؤٹ‘ کا نعرہ لگانے والے مالدیپ کے صدر محمد معیزو کی جماعت بھاری اکثریت سے کامیاب

چین کے حامی صدر کی بھاری اکثریت سے جیت، پی این سی نے اعلان کردہ 86 میں سے 66 نشستیں حاصل کیں، ابتدائی نتائج کے مطابق 93 رکنی پارلیمان میں معیزو کی پیپلز نیشنل کانگریس (پی این سی) نے دو تہائی سے زیادہ ووٹ حاصل کیے ہیں۔

مالے: (ویب ڈیسک) جنوبی ایشیاء کے ملک مالدیپ کے صدر محمد معیزو کی پارٹی نے اتوار کو ہونے والے انتخابات میں بھاری اکثریت حاصل کر لی ہے۔ ان نتائج سے ظاہر ہوتا ہے کہ رائے دہندگان نے چین کی طرف جھکاؤ اور انڈیا سے دور ہونے کی حمایت کی ہے۔ مالدیپ کے الیکشن کمیشن کے ابتدائی نتائج کے مطابق 93 رکنی پارلیمان میں معیزو کی پیپلز نیشنل کانگریس (پی این سی) نے دو تہائی سے زیادہ ووٹ حاصل کیے ہیں۔

پی این سی نے اعلان کردہ 86 میں سے 66 نشستیں حاصل کی تھیں جو اکثریت کیلئے کافی ہیں۔ نتائج کی باضابطہ توثیق میں ایک ہفتہ لگ سکتا ہے اور نئی قیادت مئی کے اوائل سے اقتدار سنبھالے گی۔ مقامی اخبار مہارو کی رپورٹ کے مطابق کل 41 میں سے صرف 3 خواتین امیدوار منتخب ہوئیں اور جیتنے والی خواتین کا تعلق معیزو کی پیپلز نیشنل کانگریس (پی این سی) سے ہے۔

اس رائے شماری کو چین کے ساتھ قریبی اقتصادی تعاون کے ساتھ آگے بڑھنے کے معیزو کے منصوبے کیلئے ایک اہم امتحان کے طور پر دیکھا گیا تھا۔ اس منصوبے میں متنازع طور پر دوبارہ حاصل کی گئی زمین پر ہزاروں اپارٹمنٹس کی تعمیر بھی شامل ہے۔ سبکدوش ہونے والی پارلیمان میں پی این سی اور اس کے اتحادیوں کے پاس صرف 8 نشستیں تھیں۔ حزبِ اختلاف کی بڑی جماعت مالدیپ ڈیموکریٹک پارٹی (ایم ڈی پی) جس کے پاس پہلے اپنی اکثریت تھی، کو شرمناک شکست کا سامنا کرنا پڑا ہے۔ 45 سالہ معیزو اتوار کو سب سے پہلے ووٹ ڈالنے والوں میں شامل تھے، انہوں نے دارالحکومت مالی (جہاں وہ پہلے میئر تھے) کے ایک سکول میں اپنا ووٹ ڈالا اور مالدیپ کے لوگوں کو کہا کہ وہ زیادہ تعداد میں ووٹ ڈالیں۔

انہوں نے نامہ نگاروں سے بات کرتے ہوئے کہا کہ تمام شہریوں کو چاہییے کہ وہ جلد از جلد باہر نکلیں اور اپنا حق رائے دہی استعمال کریں۔ گذشتہ سال ستمبر میں ہونے والے صدارتی انتخابات میں معیزو نے کامیابی حاصل کی تھی۔ رواں ماہ جب پارلیمانی انتخابات کی مہم زوروں پر تھی تو معیزو نے چین کی سرکاری ملکیت والی کمپنیوں کو ہائی پروفائل انفراسٹرکچر کے ٹھیکے دیے۔