پاکستان کا مسئلہ کشمیر پر دو ٹوک مؤقف

اسلام آباد:(نیوز ڈیسک) آج کنٹرول لائن کے دونوں اطراف اور دنیا بھر میں مقیم کشمیری یوم سیاہ منا رہے ہیں۔ اس موقع پر صدر مملکت آصف علی زرداری اور وزیراعظم شہباز شریف دونوں رہنماؤں نے اپنے الگ الگ پیغامات میں کشمیری عوام سے پاکستان کی غیرمتزلزل یکجہتی کا اعادہ کیا ہے۔ مسئلہ جموں و کشمیر کے منصفانہ اور پُرامن حل کے بغیر جنوبی ایشیا میں پائیدار امن و استحکام ممکن نہیں۔

صدر آصف علی زرداری نے کہا کہ اقوام متحدہ اور انسانی حقوق کی تنظیمیں مقبوضہ کشمیر میں ہونے والی زیادتیوں کا نوٹس لیں اور کشمیریوں کے حقوق کے تحفظ کے لیے اپنا کردار ادا کریں۔ وزیراعظم شہباز شریف نے کہا کہ پاکستان کا مؤقف بالکل واضح ہے، سلامتی کونسل کی قراردادوں اور کشمیری عوام کی خواہشات کے مطابق ہی اس مسئلے کا حل نکلنا چاہیے۔ دوسری جانب وفاقی وزیر داخلہ محسن نقوی نے کہا کہ بھارت کے کشمیر پر قبضے کو 79 سال ہو گئے ہیں لیکن کشمیری عوام آج بھی اپنے مؤقف پر قائم ہیں۔ 

وفاقی وزیر داخلہ نے کہا کہ مقبوضہ وادی میں بھارتی مظالم جاری ہیں اور ہزاروں نوجوان آزادی کی تحریک میں جانیں دے چکے ہیں۔ انھوں نے کہا کہ قائداعظم نے کشمیر کو پاکستان کی شہ رگ قرار دیا تھا جو آج بھی ہر پاکستانی کے دل کی آواز ہے۔ عالمی برادری کی خاموشی افسوسناک ہے اور پاکستان ہر فورم پر کشمیریوں کی سیاسی، سفارتی اور اخلاقی حمایت جاری رکھے گا۔