آرمی چیف کی تعیناتی روکنے سے متعلق شہری کی درخواست مسترد اور جرمانہ بھی عائد

سندھ ہائیکورٹ نے آرمی چیف کی تعیناتی روکنے سے متعلق درخواست مسترد کر دی، درخواست گزار  پر جرمانہ بھی عائد کر دیا، عدالت نے کہا کہ ہمارا کام چیف آف آرمی اسٹاف کی تعیناتی روکنا یا تعینات کرنا نہیں ہے۔

کراچی: سندھ ہائیکورٹ نے آرمی چیف کی تعیناتی روکنے سے متعلق شہری کی درخواست مسترد کر دی۔ عدالت نے درخواست گزار کی درخواست مسترد کرنے کے ساتھ ساتھ اس پر جرمانہ بھی عائد کر دیا۔ عدالت نے آرمی چیف کی تعیناتی روکنے سے متعلق شہری شبیر اسلم کی درخواست مسترد کی۔

سندھ ہائیکورٹ نے درخواست گزار شبیر اسلم پر 10 ہزار روپے جرمانہ بھی عائد کر دیا۔ عدالت نے اپنے حکم میں کہا کہ ہمارا کام چیف آف آرمی اسٹاف کی تعیناتی روکنا یا تعینات کرنا نہیں ہے۔ واضح رہے کہ آرمی چیف اور چیئرمین جوائنٹ چیفس آف اسٹاف کمیٹی کی تعیناتی کے لیے جی ایچ کیو کی سمری وزارتِ دفاع سے وزیرِ اعظم آفس میں موصول ہو چکی ہے۔

اس ضمن میں وزیرِ دفاع خواجہ آصف کا کہنا ہے کہ باقی مراحل بھی جلد طے ہو جائیں گے۔ اس سے پہلے ڈی جی آئی ایس پی آر نے کہا تھا کہ جی ایچ کیو نے چیف آف آرمی اسٹاف اور چیئرمین جوائنٹ چیفس آف اسٹاف کمیٹی کی تعیناتی کے لیے 6 سینئر موسٹ جنرلز کے نام وزارتِ دفاع کو بھیج دیے ہیں۔ دوسری جانب وزیراعظم بھی اتحادی جماعتوں سے مشاورت کر رہے ہیں۔