پی ٹی آئی کے صدر چوہدری پرویز الہیٰ کی مشکلات میں مزید اضافہ

سابق وزیراعلیٰ پنجاب اڈیالہ جیل سے رہا ہوتے ہی دوبارہ گرفتار، چوہدری پرویز الہٰی کو 12ویں مرتبہ گرفتار کیا گیا ہے، پرویز الہٰی کو گرفتار کرنے کے بعد اسلام آباد کی مقامی عدالت میں پیش کیا گیا جہاں اینٹی کرپشن حکام کی استدعا پر ان کا 1 روزہ راہداری ریمانڈ منظور کر لیا گیا ہے۔

راولپنڈی: (نیوز ڈیسک) سابق وزیراعلیٰ پنجاب اور پاکستان تحریک انصاف کے صدر چوہدری پرویز الہیٰ کی مشکلات میں مزید اضافہ ہو گیا ہے۔ تفصیلات کے مطابق پرویز الہٰی کو اڈیالہ جیل سے رہا ہوتے ہی دوبارہ گرفتار کر لیا گیا ہے۔ سابق وزیراعلیٰ پنجاب کو اینٹی کرپشن پنجاب کی ٹیم نے اڈیالہ جیل کے باہر سے گرفتار کیا ہے۔ 

چوہدری پرویز الہیٰ کے وکیل سردار عبدالرزاق کا کہنا ہے کہ پرویز الہٰی کو راہداری ریمانڈ کیلئے اڈیالہ جیل سے جوڈیشل کمپلیکس لایا جا رہا تھا۔ انہوں نے کہا کہ چوہدری پرویز الٰہی کو 12ویں مرتبہ گرفتار کیا گیا ہے۔ اڈیالہ جیل سے گرفتاری کے بعد اینٹی کرپشن نے سابق وزیر اعلیٰ پنجاب کو اسلام آباد کی مقامی عدالت میں پیش کر کے ان کا ایک روزہ راہداری ریمانڈ منظور کرا لیا ہے۔ 

اسلام آباد کی عدالت نے اینٹی کرپشن پنجاب کو حکم دیا ہے کہ انہیں کل تک متعلقہ عدالت میں پیش کر دیا جائے۔ ذرائع کے مطابق چوہدری پرویز الہیٰ کو ٹرانزٹ ریمانڈ پر لاہور منتقل کیا جائے گا۔ ریمانڈ لینے کے بعد اینٹی کرپشن پنجاب کی ٹیم سابق وزیراعلیٰ پنجاب چوہدری پرویز الہیٰ کو راولپنڈی سے لے کر لاہور کیلئے روانہ ہو گئی۔