چیٹ جی پی ٹی کی مدد سے 1 ڈالر سے بھی کم خرچ میں سافٹ وئیر تیار

صرف 7 منٹ میں سافٹ ویئر تیار کیا گیا، سافٹ وئیر کی تیاری میں اوپن اے آئی کمپنی کا تیار کردہ چیٹ جی پی ٹی 3.5 ورژن استعمال کیا گیا، سافٹ ویئر اپنے مسائل کی نشاندہی اور خود انہیں حل کرنے کے قابل بھی تھا۔

بیجنگ: (ٹیکنالوجی ڈیسک) کمپیوٹر کی دنیا سے یہ حیرت انگیز خبر آئی ہے کہ چیٹ جی پی ٹی کی مدد سے صرف 7 منٹ میں ایک سافٹ ویئر لکھا گیا ہے۔ اس مختصر وقت کے اندر سافٹ وئیر کا کوڈ بنایا گیا ہے اور جانچ بھی کی گئی۔ یہاں تک کہ سافٹ ویئر اپنے مسائل کی نشاندہی اور خود انہیں حل کرنے کے قابل بھی تھا۔

سافٹ وئیر کی تیاری میں اوپن اے آئی کمپنی کا تیار کردہ چیٹ جی پی ٹی 3.5 ورژن استعمال کیا گیا ہے۔ واضح رہے کہ چیٹ جی پی ٹی جیسے جنریٹوو اے آئی پروگرام نہ صرف تصاویر اور ویڈیو بنا رہے ہیں بلکہ اب ان سے کوڈنگ اور سافٹ ویئر پروگرامنگ کا کام بھی لیا جا رہا ہے۔ گزچائنا ویب سائٹ کے مطابق امریکی براؤن یونیورسٹی اور چینی جامعات نے ملکر یہ کام کیا ہے۔ اس کا مقصد یہ دیکھنا تھا کہ آیا اے آئی سافٹ ویئر کم سے کم انسانی مداخلت سے کوئی پروگرام بنا سکتا ہے یا نہیں؟

سب سے پہلے اس مقصد کیلئے ایک فرضی کمپنی ’چیٹ ڈیو‘ کے نام سے بنائی گئی۔ پھر اس ضمن میں چار کام اہم ہیں جن میں پلاننگ، کوڈنگ، ٹیسٹنگ اور ہدایات کی لکھائی شامل ہے، اس ضمن میں ساری ہدایات دی گئی تھیں۔ ماہرین حیران رہ گئے کہ سافٹ ویئر نے 7 منٹ کے اندر 70 ٹاسک مکمل کئے اور اس پورے عمل پر ایک ڈالر سے بھی کم خرچ آیا۔