طویل عرصے بعد مالدیپ اور ایران کے درمیان سفارتی تعلقات بحال ہو گئے

دونوں ملکوں کی جانب سے 7 سال بعد سفارتی تعلقات بحال کرنے کا اعلان کر دیا گیا، مالدیپ کے وزیر مملکت برائے خارجہ امور اور ایرانی وزیر خارجہ کی نیویارک میں ملاقات، یہ فیصلہ دونوں ملکوں کے مفادات اور خواہشات کے مطابق کیا گیا ہے۔ 

نیویارک: (ویب ڈیسک) تفصیلات کے مطابق ایران اور مالدیپ کے درمیان 7 سال بعد سفارتی تعلقات بحال ہو گئے ہیں۔ چینی خبر رساں ادارے کی رپورٹ کے مطابق ایرانی وزیر خارجہ اور مالدیپ کے وزیر مملکت برائے خارجہ امور کے درمیان نیویارک میں ملاقات ہوئی ہے۔ ملاقات کے دوران ایران اور مالدیپ کے وزرائے خارجہ نے سفارتی تعلقات بحال کرنے کا اعلان کیا ہے۔ 

ایرانی وزارت خارجہ کی جانب سے جاری کردہ بیان میں کہا گیا ہے کہ یہ فیصلہ دونوں ملکوں کے مفادات کے پیش نظر کیا گیا ہے۔ ایرانی وزیر خارجہ حسن امیر اور مالدیب کے وزیر مملکت احمد خلیل کے درمیان ہونے والی ملاقات جنرل اسمبلی کے 78ویں اجلاس کے موقع پر ہوئی ہے۔ غیر ملکی میڈیا ذرائع کے مطابق ایران اور مالدیپ کے درمیان سفارتی تعلقات کی بحالی دونوں ملکوں کے مفاد میں ہے۔ 

خیال رہے کہ ایران اور مالدیپ کے درمیان تعلقات کی بحالی دوسرے ممالک کے ساتھ ایران کے تعلقات معمول پر آنے کی لہر کا حصہ ہے۔ ایران کا دوسرے ممالک سے تعلقات بحال کرنے کا آغاز رواں سال مارچ میں ہوا تھا۔ واضح رہے کہ چین کی ثالثی میں ایران اور سعودی عرب کے درمیان سفارتی تعلقات بھی بحال ہو چکے ہیں۔ ایران اور سعودی عرب کے درمیان سفارت خانے اور مشنز کو دوبارہ کھولنے کیلئے ایک معاہدہ بھی ہوا تھا۔