کتے کی فروخت کے تنازعہ پر 3 افراد قتل

امریکی ریاست فلوریڈا میں پیش آیا افسوسناک واقعہ، لگژری اپارٹمنٹ میں کتوں کی خرید و فروخت، لین دین کے تنازعہ میں گولیاں چل گئیں۔

میامی: (ویب ڈیسک) امریکی ریاست فلوریڈا میں کتے کی فروخت پر ہونے والے جھگڑے نے 3 افراد کی جانیں لے لیں جن میں 3 سالہ بچہ بھی شامل ہے۔ امریکی نشریاتی ادارے کے مطابق بچے سمیت 5 افراد کتا خریدنے ایک لگژری اپارٹمنٹ کمپلیکس گئے تھے۔ اس دوران کتا بیچنے اور خریدنے والے کے درمیان کسی بات پر نوک جھونک ہو گئی۔

عینی شاہدین کا کہنا ہے کہ اپارٹمنٹ سے فائرنگ کی آواز آئی اور وہاں سے 2 افراد کو بھاگتے ہوئے دیکھا گیا جس پر پولیس کو اطلاع دی گئی۔ پولیس نے میڈیا کو بتایا کہ فائرنگ کے واقعے میں 3 افراد ہلاک اور ایک زخمی ہوگیا ہے جن میں ایک 3 سالہ بچہ اور ایک خاتون بھی شامل ہے۔ پولیس کی جانب سے واقعے کی تحقیقات جاری ہیں۔ 

واضح رہے کہ امریکا میں فائرنگ کے واقعات عام ہیں اور ملک میں زیادہ تر ہلاکتیں بندوق سے ہوتی ہیں جس کی بنیادی وجہ اسلحہ کی فراوانی اور گینگ وار ہے۔ گزشتہ دنوں اسکول میں فائرنگ کے نتیجے میں ایک درجن سے زائد افراد ہلاک ہو گئے تھے۔ ہلاک ہونیوالوں میں اسکول کے بچے اور اساتذہ بھی شامل تھے۔