بھارتی مظالم کا نشانہ بننے والے مسلمان باپ بیٹا پناہ کیلئے پاکستان پہنچ گئے

بھارتی مظالم کا شکار  مسلمان باپ بیٹا پناہ کے لیے پاکستان پہنچ گئے، دونوں کا تعلق دہلی سے ہے انکے پاس بھارتی دستاویزات بھی ہیں۔

کراچی: (قومی ڈیسک) 70 سالہ محمد حسنین اور  31 سالہ  اسحاق امیر کا تعلق بھارتی دارالحکومت نئی دہلی سے ہے، دونوں کراچی پہنچے ہیں اور انہوں نے حکومت پاکستان سے پناہ کی درخواست کی ہے۔متاثرہ بھارتی شہریوں کا کہنا ہے کہ  انہیں بھارت میں ہندو دہشت گردوں نےکئی دفعہ ظلم کا نشانہ بنایا، پاکستان آنےکی منصوبہ بندی کے تحت نئی دہلی سے 5 ستمبر کو  ویزے  پر  دبئی کا سفر کیا، ابوظبی سے7 ستمبر کو افغانستان کا ویزہ لیا اور  8 ستمبر کو کابل پہنچے، کابل سے ہوائی سفر کرکے قندھار  پہنچے، پھر ٹیکسی سے اسپن بولدک بارڈر پہنچے۔

دونوں باپ بیٹے کے مطابق وہ چمن بارڈر سے ایجنٹ کی مدد سے پاکستان پہنچے، ٹیکسی والے کو 10 ہزار  روپے دے کرکوئٹہ آئے، ٹیکسی والے نے مزید 50  ہزار  روپے لےکر کوئٹہ سے حب پہنچایا، حب سے رکشے میں کراچی آئے، پولیس سے خود رابطہ کیا اور  پولیس نے ایدھی سینٹر  پہنچادیا۔ دونوں کا کہنا تھا کہ ان کا کوئی ٹھکانہ نہیں ہے، وہ ایدھی فاؤنڈیشن سہراب گوٹھ میں قیام پذیر ہیں،  بھارت میں مسلمانوں کے ساتھ بہت ظلم ہو رہا ہے۔