عمران خان کیخلاف سائفر کیس کی سماعت کل اٹک جیل میں ہو گی: وزارتِ قانون
عمران خان کے خلاف سائفر کیس کی سماعت کل اٹک جیل میں ہو گی، اسلام آباد ہائیکورٹ نے سائفر کیس میں زیر حراست عمران خان کو اڈیالہ جیل منتقل کرنے کا حکم دیا تھا، تاہم انہیں اڈیالہ جیل منتقل نہیں کیا گیا۔
اسلام آباد: (قومی ڈیسک) پاکستان تحریک انصاف (پی ٹی آئی) کے چیئرمین عمران خان کے خلاف سائفر کیس کی سماعت کل اٹک جیل میں ہو گی۔ وزارتِ قانون نے سائفر کیس کی اٹک جیل میں سماعت کا نوٹیفکیشن جاری کر دیا۔ سائفر کیس کی خصوصی عدالت کے جج ابوالحسنات ذوالقرنین کل سماعت کریں گے۔
سکیورٹی صورتحال کے باعث سائفر کیس کی سماعت اٹک جیل میں ہو گی۔ دوسری جانب اسلام آباد ہائیکورٹ نے سائفر کیس میں زیرِ حراست عمران خان کو اڈیالہ جیل منتقل کرنے کا حکم دیا تھا۔ تاہم ذرائع کے مطابق ابھی تک انہیں اڈیالہ جیل منتقل نہیں کیا گیا۔
اُدھر چیئرمین پی ٹی آئی کی اڈیالہ جیل منتقلی کا عدالتی حکم نامہ آج جاری نہ ہو سکا۔ اسلام آباد ہائیکورٹ کی جانب سے عمران خان کی اڈیالہ جیل منتقلی کا حکم نامہ کل جاری ہونے کا امکان ہے۔