سعودیہ اور پاکستان کا بندھن سیاسی اور سفارتی دائرہ کار سے بالاتر ہے: چیئرمین سینیٹ
چیئرمین سینیٹ کی اسلام آباد میں سعودی عرب کے قومی دن کے موقع پر بطور مہمان خصوصی شرکت، ہمیں اپنے حقوق اور خود مختاری کے تحفظ کیلئے ملکر کام کرنا چاہئے، محمد بن سلمان کی قیادت میں سعودی عرب مزید ترقی کر رہا ہے۔
اسلام آباد: (قومی ڈیسک) چیئرمین سینیٹ محمد صادق سنجرانی نے اسلام آباد میں سعودی عرب کے قومی دن کے موقع پر پُروقار تقریب میں بطور مہمان خصوصی شرکت کی۔ محمد صادق سنجرانی نے کہا کہ پاکستان اور سعودی عرب کو اپنے حقوق اور خود مختاری کے تحفظ کیلئے ملکر کام کرنا چاہئے۔ تقریب سے خطاب کرتے ہوئے انہوں نے کہا شاہ سلمان بن عبدالعزیز، شاہی خاندان اور سعودی قوم کو قومی دن کی مبارک پیش کرتا ہوں۔
چیئرمین سینیٹ محمد صادق سنجرانی نے کہا کہ دونوں ممالک میں ایسا بندھن ہے جو سیاسی اور سفارتی دائرہ کار سے بالاتر ہے۔ ہماری شراکت داری علاقائی امن اور استحکام کے لئے ہمارے غیر متزلزل عزم پر مبنی ہے۔ ہر مشکل وقت میں پاکستان کی مدد کرنے پر ہم سعودی عرب کے شکرگزار ہیں۔
چیئرمین سینیٹ کا مزید کہنا تھا کہ ہمیں اپنے حقوق اور اپنی خودمختاری کے تحفظ کے لئے مل کر کام کرنا چاہئے۔ محمد بن سلمان کی قیادت میں سعودی عرب مزید ترقی کر رہا ہے اور مستقبل میں مزید ترقی کرے گا۔ سعودی سفیر نے کہا کہ دونوں برادر ممالک کے درمیان تعلقات گزرتے وقت کے ساتھ مزید مضبوط ہوں گے۔