تاریخ میں پہلی بار 100 انڈیکس 60 ہزار کی حد عبور کر گیا

پاکستان اسٹاک ایکسچینج میں تیزی کا رجحان برقرار، کاروبار کے دوران انڈیکس میں 742 پوائنٹس کا اضافہ، انٹربینک میں ڈالر کی قدر میں بھی کمی ہو رہی ہے۔

کراچی: (اکانومی ڈیسک) پاکستان اسٹاک ایکسچینج میں تیزی کا رجحان برقرار ہے۔ 100 انڈیکس تاریخ کی بلند ترین سطح پر پہنچ گیا ہے۔ کاروباری ہفتے کے دوسرے روز انڈیکس 60 ہزار پوائنٹس کی حد عبور کر گیا۔

اسٹاک مارکیٹ میں پہلی بار انڈیکس 60 ہزار پوائنٹس کی سطح سے اوپر گیا ہے۔ کاروبار کے دوران انڈیکس میں 742 پوائنٹس کا اضافہ ہوا۔ حالیہ اضافے کے بعد انڈیکس 60 ہزار 553 پوائنٹس پر جا پہنچا۔

واضح رہے کہ گزشتہ روز کاروبار کے اختتام پر 100 انڈیکس 59 ہزار 811 پوائنٹس پر بند ہوا تھا۔ دوسری جانب انٹربینک میں ڈالر کی قدر بھی کم ہو رہی ہے۔ ڈالر کی قیمت 14 پیسے کم ہونے کے بعد 285 روپے 36 پیسے ہو گئی ہے۔