پی ٹی آئی کے نو منتخب چیئرمین کا پہلا بیان سامنے آ گیا

بیرسٹر گوہر کا بطور چیئرمین پالیسی بیان، عمران خان سے رہنمائی لینے کا اعلان کر دیا، جیسے عمران خان کہیں گے ویسے ہی پارٹی معاملات چلائیں گے۔

اسلام آباد: (نیوز ڈیسک) تحریک انصاف کے نو منتخب چیئرمین بیرسٹر گوہر نے کہا ہے کہ کل بھی وہی فیصلہ ہوگا جو سابق پی ٹی آئی چیئرمین کا ہوگا۔ عمران خان کے جانشین کی حیثیت سے ذمہ داریاں نبھاتا رہوں گا۔ بلا مقابلہ چیئرمین پی ٹی آئی منتخب ہونے کے بعد میڈیا سے گفتگو میں انہوں نے کہا کہ اہم منصب ملنے پر سابق چیئرمین پی ٹی آئی کا شکریہ ادا کرتا ہوں۔

انہوں نے کہا کہ تحریک انصاف کے سابق چیئرمین عمران خان نے موروثی سیاست ختم کر دی ہے۔ ان کا دیا گیا یہ منصب میرے پاس امانت ہے، ہمیں ملک کو آگے لے کر جانا ہے، فارن فنڈنگ صرف ہماری پارٹی کا دیکھا گیا۔ انتخابات کیلئے پی ٹی آئی کی تیاری مکمل ہے اور آئندہ انتخابات میں بھرپور حصہ لیں گے۔

بیرسٹر گوہر نے کہا کہ پی ٹی آئی کے ساتھ عوامی طاقت ہے، اسے کوئی نہیں ہرا سکتا۔ جس دن الیکشن ہوا مخالفین کی ضمانتیں ضبط ہوں گی۔ انہوں ںے مزید کہا کہ الحمدللّٰہ ہمارے انٹرا پارٹی الیکشن کا عمل اچھا رہا، اس اعتماد کیلئے خان صاحب کا بہت مشکور ہوں۔