فرانس میں طلبہ احتجاج کے دوران 143 سالہ تاریخی سٹی ہال آتشزدگی کا شکار

پیرس: (ویب ڈیسک) رپورٹ کے مطابق واقعہ 17 اکتوبر کو پیش آیا، جب فرانس بھر میں طلبہ اعلیٰ تعلیم کے لیے زیادہ فنڈز، بہتر سہولتوں اور بڑھتے ہوئے اخراجات کے خلاف احتجاج کر رہے تھے۔ فرانسیسی وزیر داخلہ لوراں نونیز کے مطابق ہفتے کے روز ملک بھر میں تقریباً 5 لاکھ 50 ہزار افراد نے احتجاجی مارچ میں شرکت کی، جن میں سے بیشتر مظاہرے پُرامن رہے، تاہم بعض مقامات پر توڑ پھوڑ کے واقعات بھی پیش آئے۔ مقامی حکام کا کہنا ہے کہ لیموج میں نقاب پوش افراد نے سٹی ہال کی کھڑکیاں توڑ کر عمارت کو آگ لگائی۔

1883 میں تعمیر ہونے والا لیموج سٹی ہال شہر کی تاریخی شناخت کا اہم حصہ تھا اور 1975 میں اسے تاریخی یادگار کا درجہ دیا گیا تھا۔ دوسری جنگِ عظیم کے دوران بھی یہ عمارت اہم واقعات کی گواہ رہی، جبکہ شہر فرانسیسی مزاحمتی سرگرمیوں کا مرکز بنا اور 21 اگست 1944 کو آزاد ہوا۔ مقامی پریفیکٹ مورس باراتے نے آتشزدگی کو ثقافتی ورثے کے لیے تباہ کن سانحہ قرار دیا، جبکہ میئر گیوم گورین نے الزام لگایا کہ عمارت کو جان بوجھ کر آگ لگائی گئی اور مرمت کے لیے مناسب سرکاری فنڈز نہ ملنے پر مستعفی ہونے کی دھمکی دی۔

آگ سے ہونے والے نقصان کی مکمل مالی مالیت تاحال سامنے نہیں آئی، تاہم آتشزدگی سے قبل عمارت کی بحالی پر تقریباً 40 لاکھ یورو خرچ ہونے کا تخمینہ تھا۔ عمارت میں پتھر کے آرائشی مجسمے، موزائیک اور چینی کے برتنوں سے متعلق تزئینی کام موجود تھا، جن کی اصل حالت میں بحالی مشکل ہوسکتی ہے۔ اس واقعے نے فرانس میں تاریخی عمارتوں کے تحفظ اور احتجاجی مظاہروں کے دوران ثقافتی ورثے کی سلامتی سے متعلق خدشات کو مزید نمایاں کردیا ہے۔

#InternationalNews
#19thOct2026
#France 
#Limoges
 #HistoricTownHall
 #StudentProtests
 #CulturalHeritage
 #TVN
#News
#TVNUrdu
#TVNWorld
#TheViewsNetwork