انڈے کھانے سے پہلے تازگی جانچنے کے 7 آسان گھریلو طریقے

اسلام آباد: (ویب ڈیسک) انڈے پروٹین اور دیگر اہم غذائی اجزا سے بھرپور غذا ہیں، اسی لیے انہیں ناشتے سمیت روزمرہ خوراک میں استعمال کیا جاتا ہے۔ تاہم خراب یا آلودہ انڈے صحت کے لیے نقصان دہ ثابت ہو سکتے ہیں۔ ماہرین کے مطابق انڈے استعمال کرنے سے پہلے ان کی تازگی جانچنا ضروری ہے، جس کے لیے چند آسان گھریلو طریقے اختیار کیے جا سکتے ہیں۔ 

انڈے کی تازگی جانچنے کے لیے اسے ٹھنڈے پانی میں ڈال کر دیکھا جا سکتا ہے۔ اگر انڈا نیچے بیٹھ جائے تو عموماً تازہ ہوتا ہے، جبکہ پانی کی سطح پر تیرنا اس کے پرانا ہونے کی علامت ہو سکتا ہے۔ انڈا توڑنے کے بعد تیز یا ناگوار بدبو، غیرمعمولی رنگ، چھلکے پر دراڑیں، چپچپاہٹ یا پھپھوندی نظر آئے تو اسے استعمال نہ کریں۔ انڈے کو ہلانے سے اندر مائع کی آواز آنا بھی اس کی عمر بڑھنے کی علامت ہو سکتی ہے۔ 

انڈے خریدتے وقت پیکنگ پر درج تاریخ اور چھلکے کی حالت ضرور دیکھیں۔ انہیں فریج میں محفوظ رکھیں، کچے یا نیم پکے انڈے کھانے سے گریز کریں اور استعمال سے پہلے اچھی طرح پکائیں۔ موبائل کی ٹارچ سے انڈے کے اندرونی حصے کا جائزہ لینے سے بعض نقائص کا اندازہ لگایا جا سکتا ہے، لیکن اس سے جراثیمی یا کیمیائی آلودگی کی تصدیق نہیں ہوتی۔ ممنوعہ اینٹی بائیوٹکس کی باقیات کا پتا لگانے کے لیے لیبارٹری ٹیسٹ ضروری ہوتے ہیں۔