یوٹیوب کی بڑی سہولت، ادائیگی کی کم از کم حد 100 ڈالر سے 20 ڈالر کرنے کی آزمائش

کیلیفورنیا: (ٹیکنالوجی ڈیسک) یوٹیوب پارٹنر پروگرام کے تحت آمدنی حاصل کرنے والے تخلیق کاروں کو عام طور پر اس وقت ادائیگی کی جاتی ہے جب ان کے اکاؤنٹ میں مقررہ حد کے مطابق رقم جمع ہوجائے، جو عموماً 100 ڈالر ہے۔ رپورٹس کے مطابق یوٹیوب نئی سہولت کو امریکا، بھارت اور انڈونیشیا کے محدود صارفین پر آزما رہا ہے۔ کمپنی کے مطابق اس تجربے کا مقصد ادائیگی کے نظام میں مزید سہولت فراہم کرنا ہے، جس کے تحت منتخب صارفین 100 ڈالر کی حد پوری ہونے سے پہلے بھی 20 ڈالر کی کم از کم حد پر ادائیگی حاصل کرسکیں گے، بشرطیکہ وہ دیگر ضروری شرائط پوری کرتے ہوں۔

رپورٹس کے مطابق اس تجربے کے لیے منتخب کیے گئے صارفین کو یوٹیوب کی جانب سے باقاعدہ اطلاع بھی دی گئی ہے۔ تاہم، آزمائش کی مدت اور اسے تمام صارفین کے لیے متعارف کرانے کے حوالے سے کوئی حتمی اعلان سامنے نہیں آیا۔ اگر یہ تبدیلی مستقل پالیسی کا حصہ بن جاتی ہے تو کم آمدنی حاصل کرنے والے تخلیق کاروں کو اپنی رقم نسبتاً جلد وصول کرنے میں سہولت مل سکتی ہے۔

یہ پیش رفت ایسے وقت میں سامنے آئی ہے جب سوشل میڈیا پلیٹ فارمز ویڈیو مواد کے شعبے میں ایک دوسرے سے مقابلہ کر رہے ہیں۔ رپورٹس کے مطابق انسٹاگرام بھی 90 منٹ تک طویل ویڈیوز پوسٹ کرنے کی سہولت آزما رہا ہے۔ یوٹیوب کی جانب سے ادائیگی کی کم از کم حد میں ممکنہ تبدیلی پاکستان سمیت دیگر ممالک کے تخلیق کاروں کے لیے بھی اہم ہوسکتی ہے، تاہم پاکستان میں اس سہولت کے آغاز کی تاحال تصدیق نہیں ہوئی۔

#TechnologyNews
#29thOct2026
#YouTube #YouTubeCreators #CreatorEconomy #DigitalEarnings #TechNews #SocialMedia
#TVN
#News
#TVNNews
#TVNUrdu
#TVNTechnology
#TheViewsNetwork