نئے کرنسی نوٹوں کے ڈیزائن اور 10 روپے کے سکے کے اجرا کی منظوری

اسلام آباد: (نیوز ڈیسک) وزیراعظم شہباز شریف کی زیرصدارت وفاقی کابینہ کے اجلاس میں خیبرپختونخوا میں انتظامی امور کی انجام دہی اور گورننس بہتر بنانے کے لیے ایمرجنسی کی مدت کے دوران وزیراعلیٰ کو تفویض شدہ اختیارات گورنر خیبرپختونخوا کو منتقل کرنے کی منظوری دی گئی۔ گورنر ان اختیارات کے استعمال سے متعلق ہر ماہ وفاقی حکومت کو جائزہ رپورٹ پیش کریں گے۔ کابینہ نے امید ظاہر کی کہ گورنر کی سربراہی میں خیبرپختونخوا ایڈوائزری کونسل عوام کی فلاح و بہبود، خوشحالی اور صوبے میں امن و امان کے قیام کے لیے مؤثر کردار ادا کرے گی۔

اجلاس میں پاکستان اور کویت کے درمیان دفاعی تعاون کے معاہدے کی بھی توثیق کی گئی، جو 11 جون 2023 کو طے پایا تھا اور اس کا مقصد دونوں ممالک کے درمیان دفاعی شعبے میں تعاون کو فروغ دینا ہے۔ کویتی حکومت اس معاہدے کی 19 جولائی کو توثیق کر چکی ہے۔ وفاقی کابینہ نے وزارت خزانہ کی سفارش پر نئے کرنسی نوٹوں کے ڈیزائن کی منظوری بھی دی۔ اجلاس کو بتایا گیا کہ ڈیزائن تیار کرنے کے لیے ملک بھر کے مصوروں اور ڈیزائنرز سے تجاویز حاصل کی گئیں، جبکہ وزیراعظم کی قائم کردہ کابینہ کمیٹی نے تمام متعلقہ فریقوں سے مشاورت کی۔

بریفنگ میں بتایا گیا کہ جعلی کرنسی کی روک تھام کے لیے نئے نوٹوں میں جدید سیکیورٹی فیچرز اور میٹریل استعمال کیا جائے گا، جس سے ان کی پائیداری میں بھی اضافہ ہوگا۔ کابینہ نے 10 روپے کے بینک نوٹ کی جگہ 10 روپے کا سکہ متعارف کرانے کی منظوری بھی دے دی۔ اس کے علاوہ کابینہ کمیٹی برائے حکومتی ملکیتی اداروں کے 26 اکتوبر کے اجلاس اور کابینہ کمیٹی برائے قانون سازی کے 22 جنوری، 26 فروری، 5، 18 اور 27 اگست، 11 اور 22 ستمبر کے اجلاسوں میں کیے گئے فیصلوں کی بھی توثیق کردی گئی۔

#NationalNews
#4thNov2026
#FederalCabinet
 #KhyberPakhtunkhwa
 #CurrencyNotes
 #PakistanKuwait
 #DefenceCooperation
 #Pakistan
#TVN
#News
#TVNUrdu
#TVNNational 
#TheViewsNetwork