پاکستان میں پہلی ایئر ایمبولینس سروس کے آغاز کے لئے تربیتی سیشن شروع
پاکستان کی پہلی ایئر ایمبولینس سروس کیلئے تربیتی سیشن کا آغاز کر دیا گیا، دوردراز علاقوں میں حادثے کی صورت میں ایئر ایمبولینس سروس استعمال ہوگی۔
لاہور: (قومی ڈیسک) وزیراعلیٰ پنجاب مریم نواز کی زیر صدارت ایئر ایمبولینس سروس پر پیشرفت کا جائزہ لینے کے لئے خصوصی اجلاس ہوا جس میں صوبائی وزیر اطلاعات عظمیٰ بخاری، چیف سیکرٹری پنجاب، سیکرٹری فنانس، ڈی جی ریسکیو سروسز اور دیگر حکام شریک ہوئے۔ اجلاس کے دوران بریفنگ میں بتایا گیا کہ پہلی ایئر ایمبولینس سروس کے لیے پہلے تربیتی سیشن کا باقاعدہ آغاز کر دیا گیا ہے۔
اس موقع پر گفتگو کرتے ہوئے وزیراعلیٰ مریم نواز کا کہنا تھا کہ پنجاب میں ایئر ایمبولینس سروس کے دائرہ کار کو مزید وسعت دی جائے گی، دوردراز علاقوں میں حادثے کی صورت میں ایئر ایمبولینس سروس استعمال ہوگی، انسانی جان سے بڑھ کر کچھ نہیں، تمام تر وسائل صوبے کی عوام پر خرچ کریں گے۔ ان کا مزید کہنا تھا کہ ایمرجنسی کی صورت میں ایئر ایمبولینس سروس مہیا ہو گی۔