بانی پی ٹی ائی کو کوئی مائنس نہیں کر سکتا ہے: علی امین گنڈا پور

علی امین گنڈہ پور کا کہنا ہے بانی پی ٹی ائی کو کوئی مائنس نہیں کر سکتا ہے، ہمیں اشتعال دلانے سے گریز کریں، انتخابات میں بدترین دھاندلی ہوئی۔

پشاور: (قومی ڈیسک) وزیراعلیٰ خیبرپختونخوا علی امین گنڈا پور  کا کہنا ہے کہ بانی پی ٹی آئی عمران خان نے کوئی غیر قانونی کام نہیں کیا، نہ وہ ملک کو نقصان پہنچانا چاہتے ہیں، انہیں مزید قید میں رکھنا اب کسی کے بس میں نہیں۔ پی ٹی آئی کے یوم تاسیس پر تقریب سے خطاب  کرتے ہوئے  وزیراعلیٰ خیبر پختو نخوا علی امین گنڈا پور  نے کہا کہ انتخابات میں بدترین دھاندلی ہوئی، مینڈیٹ چوری کرنے والوں کو مسلط کر دیا گیا، لیکن ذاتی مفاد میں پڑنے والے کامیاب نہیں ہوں گے۔

انہوں نے کہا کہ  کوئی طاقت ہمیں بانی پی ٹی آئی سے دور نہیں کر سکتی، 8 فروری کے بعد 21 اپریل کو دوبارہ حرکت کی گئی ہے، سب سن لو مائنس بانی پی ٹی آئی کوئی نہیں کرسکتا۔ وزیر اعلیٰ علی امین گنڈا پور کا کہنا تھا کہ آنے والے دنوں میں اگر حق نہ ملا تو پھر خیبرپختونخوا نکلے گا اور اگر خیبرپختونخوا نکلے گا تو وہ بانی پی ٹی آئی کو رہا کروا کر ہی جائے گا۔