سیرل رامافوسا جنوبی افریقہ کے نئے صدر منتخب

جنوبی افریقن صدر کیلئے ووٹنگ، 283 اراکینِ اسمبلی نے صدر سیرل راما کے حق میں ووٹ دیا، مخالف امیدوار کو صرف 44 ووٹ ملے۔

کیپ ٹاؤن: (ویب ڈیسک) جنوبی افریقن حکمراں پارٹی افریقن نیشنل کانگریس کے لیڈر سیرل راما فوسا کو جمعہ کے روز قومی اسمبلی نے اگلے 5 سال کیلئے ملک کا صدر منتخب کر لیا ہے۔ قومی اسمبلی کی پہلی نشست کی صدارت کرنے والے چیف جسٹس ریمنڈ زونڈو نے اعلان کیا کہ رامافوسا کو صدارتی انتخاب کیلئے 283 ووٹ حاصل ہوئے۔ اپوزیشن کی طرف سے نامزد امیدوار جولیس ملیما کو صرف 44 ووٹ ملے۔

صدر کے طور پر دوبارہ منتخب ہونے کے بعد اپنے پہلے خطاب میں رامافوسا نے کہا کہ انہوں نے اپنے دوبارہ انتخاب کو ایک عظیم ذمہ داری کے طور پر قبول کیا ہے۔ ان کا کہنا تھا کہ وہ ان لوگوں کے ساتھ بھی کام کریں گے جنہوں نے ان کا ساتھ نہیں دیا۔ انہوں نے کہا کہ مئی کے آخر میں ہونے والے عام انتخابات کے نتائج نے واضح کر دیا ہے کہ ملک کے عوام اپنے لیڈروں سے مل کر کام کرنے کی توقع رکھتے ہیں۔

رامافوسا نے کہا کہ ہمارے لوگ اپنے ووٹوں کے ذریعے امید کرتے ہیں کہ غیر نسل پرستی اور غیر جنس پرستی پر مبنی اور امن و انصاف پر مبنی جمہوری معاشرے کا فروغ چاہتے ہیں۔ انہوں نے کہا کہ ملک میں استحکام کو یقینی بنانے، غربت، بے روزگاری اور عدم مساوات کے ٹریپل چیلنجوں سے نمٹنے اور سب کی خوشحالی حاصل کرنے کیلئے تمام جماعتیں آئین کے فریم ورک کے اندر مل کر کام کریں گی۔ 71 سالہ رامافوسا نے زور دے کر کہا کہ متعدد جماعتوں کے اتفاق رائے سے بننے والی قومی اتحاد کی حکومت 2 یا 3 جماعتوں کا بڑا اتحاد نہیں ہے۔