وفاقی حکومت کی طرف سے تحریک انصاف کا ممکنہ لانگ مارچ روکنے کے لیے حکمت عملی تیار

وفاقی دارالحکومت میں ریڈ زون کو کینٹینرز لگا کر سیل کر دیا گیا ہے، جب کہ صوبوں سے پولیس، رینجرز اور ایف سی کے 30 ہزار اہلکار طلب کر لیے گئے ہیں۔

اسلام آباد:  عمران خان کی جانب سے اسلام آباد کی جانب لانگ مارچ کا عندیہ دے دیا گیا ہے، تاحال لانگ مارچ کی تاریخ سامنے نہیں آئی، تاہم اس اعلان اور ممکنہ لانگ مارچ کے پیش نظر اسلام آباد پولیس نے امن و امان یقینی بنانے کی تیاریاں شروع کر دی ہیں۔ پولیس ذرائع نے بتایا کہ آنسو گیس پھینکنے والے ڈرونز اور اضافی شیل بھی طلب کر لئے گئے ہیں، پولیس اہلکاروں اور افسران کی چھٹیاں منسوخ کر دی گئی ہیں، آپریشنز ڈویژن کو قیدی وینز فراہم کرنے اور زخمیوں کے لئے ایمبولینسز بھی الرٹ کر دی گئی ہیں۔

وفاقی وزیر داخلہ رانا ثنا الله  نے کہا ہے کہ عمران خان کا اس بار ایسا بندوبست کریں گے کہ دوبارہ کبھی اسلام آباد کا رخ نہیں کریں گے۔ ان کا کہنا تھا کہ عمران خان جرات کریں ایکس، وائے نہیں، سیدھی بات کریں۔

اطلاعات کے مطابق تحریک انصاف کا شہر اقتدار کی طرف لانگ مارچ روکنے کے لئے وفاقی حکومت نے پیش بندی کر لی ہے، اسلام آباد میں سینکڑوں کنٹینرز بھی لگائے جائیں گے، اور پولیس ذرائع کے مطابق شہر اقتدار کے داخلی راستوں پر کنٹینرز لگانے کے علاوہ خندقیں کھودنے کی تجویز بھی زیر غور ہے۔ اسکے ساتھ ساتھ کارکنان کی بڑے پیمانے پر گرفتاریاں بھی متوقع ہیں۔