صرافہ بازاروں میں افراتفری کے باعث سونے کے من مانے نرخ

سونے کی سرکاری قیمت 2 لاکھ 15 ہزار روپے، سٹے باز تجارتی معطلی سے متعلق سرکاری موقف کی خلاف ورزی کر رہے ہیں، پشاور میں فی تولہ سونے کی قیمت 2 لاکھ 30 ہزار تک پہنچ گئی ہے۔

کراچی: (اکانومی ڈیسک) تفصیلات کے مطابق صرافہ مارکیٹ کا مسئلہ حل نہ ہونے کے باعث سٹے بازوں نے سونے کی قیمتوں پر راج کرنا شروع کر دیا ہے۔ سرکاری طور پر بلین ٹریڈ تقریباً ایک ہفتے سے معطل ہے۔ قیاس آرائیوں کو ختم کرنے کیلئے صرافہ ایوسی ایشن اور حکام کے درمیان منصوبہ تیار کرنے کیلئے مذاکرات جاری ہیں۔

صرافہ ایسوسی ایشن کے مطابق سٹے بازوں کی جانب سے تجارتی معطلی کے سرکاری فیصلے کی خلاف ورزی کی جا رہی ہے۔ سٹے بازوں نے سونے کے نرخوں کو کھولا جس سے صرافہ بازاروں میں افراتفری پھیل گئی ہے۔ کراچی کی صرافہ مارکیٹوں میں فی تولہ سونے کی قیمت 2 لاکھ 18 ہزار 500 روپے تک پہنچ گئی ہے۔ 

واضح رہے کہ سونے کی سرکاری قیمت 2 لاکھ 15 ہزار روپے ہے۔ آل پاکستان جیمز اینڈ جیولرز ایسوسی ایشن کے صدر حاجی ہارون چند نے کہا ہے کہ سٹے باز تجارتی معطلی سے متعلق سرکاری موقف کی خلاف ورزی کرکے اپنے من مانے نرخ کھول رہے ہیں۔ لاہور میں سونے کی فی تولہ قیمت 2 لاکھ 22 ہزار روپے، پشاور میں 2 لاکھ 30 ہزار اور کراچی میں 2 لاکھ 17 ہزار روپے ہے۔