سینٹرل کنٹریکٹ کا معاملہ انضمام الحق کے سپرد

چیئرمین پی سی بی ان ایکشن، سینٹرل کنٹریکٹ کا معاملہ حل کرنے کیلئے چیف سلیکٹر کو ذمہ داریاں تفویض، انضمام الحق نے 2 دن میں معاملہ حل کرنے کی امید ظاہر کر دی۔

لاہور: (اسپورٹس ڈیسک) پاکستان کرکٹ ٹیم کے کھلاڑیوں کے سینٹرل کنٹریکٹ کو لے کر چیئرمین پاکستان کرکٹ بورڈ (پی سی بی) مینجمنٹ کمیٹی ذکاء اشرف نے ایکشن لیتے ہوئے معاملہ  چیف سلیکٹر انضمام الحق کو سونپ دیا ہے۔ تفصیلات کے مطابق پی سی بی اور قومی کھلاڑیوں کے درمیان اس وقت سینٹرل کنٹریکٹ پر ڈیڈ لاک برقرار ہے۔ پی سی بی چاہتی ہے کہ جب کھلاڑی ورلڈکپ میں شرکت کیلئے بھارت روانہ ہوں تو ان کی توجہ معاہدوں پر نہیں بلکہ کھیل پر ہو۔ 

چیف سلیکٹر کو ٹاسک سونپے جانے پر انضمام الحق نے ذکاء اشرف کو یقین دلایا ہے کہ یہ معاملہ 2 دن میں حل کیا جا سکتا ہے۔ تمام کھلاڑی محبِ وطن ہیں اور چاہتے ہیں کہ کوئی تنازعہ نہ ہو۔ ذرائع کے مطابق پی سی بی کے ایک آفیشل نے بتایا ہے کہ پیر یا منگل تک کھلاڑیوں کے معاہدوں سے متعلق کوئی اچھی خبر سامنے آ سکتی ہے۔ کرکٹ بورڈ کوشش کرے گا کہ سارے نہیں تو بعض مطالبات کو کسی حد تک تسلیم کر لیا جائے تاکہ مسئلہ حل ہو۔

خیال رہے کہ قومی کرکٹرز اور پی سی بی انتظامیہ کے درمیان ڈھائی ماہ سے سینٹرل کنٹریکٹ کی متنازع شقوں پر ڈیڈ لاک ہے۔ یہی وجہ ہے جس کے باعث نئے کنٹریکٹ کے مطابق معاوضے کی ادائیگیاں رکی ہوئی ہیں۔ نئے معاہدے کے تحت ایک شرط یہ رکھی گئی ہے کہ کوئی بھی کھلاڑی انٹرنیشنل لیگ اور ذاتی کنٹریکٹ یا کوئی کمرشل ڈیل پی سی بی کو بتائے بغیر نہیں کر سکے گا۔