بھارت نے ورلڈ کپ کیلئے پاکستانی اسکواڈ کے ویزوں کی منظوری دے دی

بھارت نے ورلڈ کپ کیلئے پاکستانی اسکواڈ کے ویزوں کی منظوری دے دی، پاکستان کرکٹ ٹیم بدھ کی علی الصبح بھارت کے لیے روانہ ہو گی، قومی ٹیم اپنا پہلا وارم اپ میچ نیوزی لینڈ کے خلاف کھیلےگی۔

اسلام آباد: (سپورٹس ڈیسک) آئی سی سی کرکٹ ورلڈکپ میں شرکت کے لیے پاکستان کرکٹ ٹیم کو بھارتی ویزوں کے اجرا کا معاملہ حل ہوگیا، پاکستان اسکواڈ کو بھارتی ویزے جاری کردیے گئے ہیں۔ بھارت میں ہونے والے آئی سی سی ورلڈکپ میں شرکت کے لیے پاکستان اسکواڈ کے بھارتی ویزے منظور  ہوگئے ہیں۔ اس حوالے سے آئی سی سی کا بھی کہنا ہےکہ بھارت نے پاکستان کرکٹ ٹیم کے لیے ویزے جاری کردیے ہیں، تاخیر کی شکایات کے بعد ورلڈکپ میں شرکت کے لیے ویزے جاری کر دیے گئے ہیں۔

ترجمان پی سی بی کے مطابق ٹیم کو اپنے پاسپورٹ اسلام آباد میں بھارتی ہائی کمیشن سے لینےکو کہہ دیا گیا تھا۔ ذرائع کے مطابق اب بھارتی ہائی کمیشن سے تمام 33 پاسپورٹ لے لیےگئے ہیں۔ اس سے قبل بھارتی حکومت کی جانب سے این او سی کے اجرا میں تاخیر کی وجہ سے پاکستان ٹیم کی ورلڈ کپ کے لیے روانگی غیر یقینی صورت حال کا شکار تھی، جس پر  پی سی بی نے آئی سی سی کو خط بھی لکھا تھا۔ 

ذرائع کے مطابق بھارتی ہائی کمیشن نے پاکستان کرکٹ بورڈ کو  پیش رفت سے آگاہ کردیا ہے اور کہا ہے، کہ پاکستان ٹیم کو  ویزے جاری کردیے گئے ہیں اور  جلد اسکواڈ ممبران کو پاسپورٹ اور  دیگر سفری دستاویزات مل جائیں گی۔ پاکستان کرکٹ ٹیم بدھ کی علی الصبح بھارت کے لیے روانہ ہوگی جہاں وہ 29 ستمبر کو حیدر آباد میں پہلا وارم اپ میچ نیوزی لینڈ کے خلاف کھیلےگی۔