بھارت میں پاکستان، نیوزی لینڈ وارم اپ میچ بند دروازوں کے پیچھے کھیلا جائے گا: چیئرمین بی سی سی آئی

 پاکستان نیوزی لینڈ وارم اَپ میچ کے حوالے سے بھارتی بورڈ کا بیان سامنے آگیا، بھارتی کرکٹ بورڈ نے پیر کو جاری اپنے ایک بیان میں کہا ہے کہ ہندو تہوار گنیش وسرجن اور عید میلاد النبی کی وجہ سے سیکیورٹی خدشات ہیں جس کے باعث میچ میں شائقین کرکٹ شرکت نہیں کر سکیں گے۔ 

 حیدرآباد: (اسپورٹس ڈیسک) پاکستان اور نیوزی لینڈ کے درمیان ورلڈ کپ 2023ء کا وارم اپ کھیل 29 ستمبر کو بغیر تماشائیوں کے بھارتی ریاست حیدرآباد میں راجیو گاندھی انٹرنیشنل اسٹیڈیم میں کھیلا جائے گا۔ انڈین ذرائع کے مطابق پولیس نے حیدرآباد کرکٹ ایسوسی ایشن سے سیکیورٹی خدشات کی وجہ سے وارم اپ میچ ملتوی کرنے کے لیے کہا تھا کیونکہ پولیس 28 ستمبر کو ختم ہونے والے مذہبی تہوار پر اپنی توجہ مرکوز رکھے گی۔رپورٹ میں کہا گیا کہ شیڈول کے سخت ہونے کی وجہ سے عہدیداروں نے تماشائیوں کے داخلے پر پابندی عائد کرنے کا فیصلہ کیا ہے۔

تفصیلات کے مطابق بورڈ آف کنٹرول فار کرکٹ ان انڈیا کے ایک عہدیدار نے انڈین ایکسپریس کو بتایا کہ میچ تماشائیوں کے بغیر کھیلا جائے گا اور جنہوں نے اپنے ٹکٹ بک کرائے ہیں، ان کے پیسے واپس کر دیے جائیں گے۔انہوں نے کہا کہ 29 ستمبر کو ہونے والے وارم اپ میچ کے سیکیورٹی انتظامات کے حوالے سے گزشتہ چند دنوں سے بات چیت چل رہی ہے کیونکہ اس درمیان دو مذہبی تہواروں کی آمد ہے۔ پولیس نے کہا کہ مذہبی تہوار کی وجہ سے ان پر اس میچ کے لیے سیکیورٹی فراہم کرنے کے لیے سخت دباؤ ہوگا۔

یاد رہے کہ گزشتہ ماہ آئی سی سی کی جانب سے بھارت اور پاکستان کے درمیان انتہائی اہم مقابلے سمیت 9 میچوں کے بعد ورلڈ کپ کے شیڈول میں بہت سی تبدیلیاں کی گئی ہیں۔