پیاز کی پیداوار کے لحاظ سے پاکستان دنیا بھر میں پانچویں نمبر پر

ماہرینِ زراعت کی دسمبر کے آغاز میں پنیری کھیتوں میں منتقل کرنے کی ہدایت، پیاز کو زیادہ دیر تک ذخیرہ نہیں کیا جا سکتا، ملک بھر کے کسان سال کے مختلف اوقات میں پیاز کی فصل کاشت کرتے رہتے ہیں۔

اسلام آباد: (اکانومی ڈیسک) پاکستان دنیا بھر میں پیاز پیدا کرنے والے ممالک میں پانچویں نمبر پر آ گیا ہے۔ دنیا بھر میں پیاز کی سب سے زیادہ کاشت چین میں ہوتی ہے۔ پاکستان کے کسان بھی سال کے مختلف اوقات میں پیاز کی فصل کاشت کرتے رہتے ہیں۔

پاکستان میں پنجاب، سندھ، خیبر پختونخوا اور بلوچستان میں پیاز کی فصل کاشت کی جاتی ہے۔ ملک بھر میں کثرت سے کاشت ہونے کے باعث پیاز سارا سال مارکیٹ میں دستیاب رہتا ہے۔ پیاز کو زیادہ دیر تک ذخیرہ نہیں کیا جا سکتا تاہم زیرو ڈگری سینٹی گریڈ درجہ حرارت اور 60 سے 65 فیصد نمی کی صورت میں پیاز کو قدرے دیر تک ذخیرہ کیا جا سکتا ہے۔

ماہرینِ زراعت نے بمپر کراپ کے حصول کیلئے کاشتکاروں کو پیاز کی اکتوبر کاشتہ نرسری اگلے ماہ دسمبر کے آغاز میں کھیتوں میں منتقل کرنے کی ہدایت کی ہے۔ واضح رہے کہ ملک میں پیاز کی 2 فصلیں کاشت کی جاتی ہیں۔ اکتوبر میں کاشت کی گئی نرسری دسمبر میں کھیتوں میں منتقل کی جاتی ہے جس کی پیداوار اپریل اور مئی میں حاصل ہونا شرو ع ہو جاتی ہے۔