پاکستانی فائٹر منیشا علی کا تاریخ ساز اقدام: انگولا میں IMMAF ورلڈ کپ 2026ء میں گولڈ میڈل حاصل کر لیا

لوانڈا: (اسپورٹس ڈیسک) پاکستان کی باہمت فائٹر منیشا علی نے انگولا کے دارالحکومت لوانڈا میں منعقدہ IMMAF ورلڈ کپ 2026ء میں شاندار کارکردگی کا مظاہرہ کرتے ہوئے گولڈ میڈل اپنے نام کر لیا ہے۔ گلگت بلتستان سے تعلق رکھنے والی منیشا علی نے مقابلے کے انتہائی سنسنی خیز فائنل میچ میں ہوم کراؤڈ کا سامنا کرتے ہوئے اپنے عزم اور صلاحیتوں کا لوہا منوایا۔ انہوں نے دو بار کی افریقن چیمپئن لیونیلا ازابیل بلیئے کو دوسرے ہی راؤنڈ میں اپنے خطرناک داؤ "اسٹینڈنگ گلیٹین چوک" کے ذریعے سبمیشن پر مجبور کر کے یہ فتح حاصل کی ہے۔

منیشا علی کی یہ عالمی کامیابی اس لحاظ سے انتہائی شاندار ہے کہ انہوں نے صرف ایک سال سے بھی کم عرصے میں باقاعدہ ٹریننگ حاصل کی ہے۔ اتنی مختصر مدت میں عالمی سطح پر حریفوں کو مات دے کر سونے کا تمغہ جیتنا ان کی غیر معمولی قابلیت اور محنت کا واضح ثبوت ہے۔ ان کا یہ تاریخ ساز سنگِ میل نہ صرف کھیل کے میدان میں ایک بڑی پیش رفت ہے بلکہ پاکستان بھر بالخصوص گلگت بلتستان کیلئے انتہائی فخر کا باعث بھی ہے۔

اس شاندار کامیابی کے بعد منیشا علی کا حوصلہ مزید بلند ہو چکا ہے اور وہ مستقبل کے عالمی مقابلوں میں مزید فتوحات سمیٹنے کیلئے پُراعتماد ہیں۔ وہ اب جارجیا میں منعقد ہونے والی اگلی ورلڈ چیمپئن شپ میں پاکستان کی نمائندگی کرنے کیلئے بھرپور تیاری اور عزم کا اظہار کر رہی ہیں۔ قوم کو قوی امید ہے کہ وہ اپنی محنت اور لگن سے آئندہ بھی بین الاقوامی سطح پر سبز ہلالی پرچم کی شان میں اضافے کا باعث بنیں گی۔