27 ستمبر کو ہر صورت اسلام آباد نکلیں گے، ہمیں کوئی نہیں روک سکتا، سہیل آفریدی

پشاور: (نیوز ڈیسک) وزیراعلیٰ خیبرپختونخوا سہیل آفریدی نے وزیراعلیٰ ہاؤس میں تحریک انصاف کی پارلیمانی پارٹی کے اجلاس کے بعد میڈیا سے گفتگو کرتے ہوئے کہا ہے کہ 27 ستمبر کو ہر صورت اسلام آباد کے لیے نکلیں گے، ہمیں کوئی نہیں روک سکتا۔ اجلاس میں تحریک انصاف کے مرکزی و خیبرپختونخوا کے رہنماؤں، چیئرمین بیرسٹر گوہر، اسد قیصر، عاطف خان اور شاہد خٹک سمیت دیگر نے شرکت کی، جبکہ اجلاس میں 27 ستمبر کے حوالے سے آئندہ کے لائحہ عمل پر مشاورت کی گئی۔

سہیل آفریدی نے کہا ہے کہ 26 نومبر 2024ء کے واقعات کے باوجود تحریک انصاف نے آواز اٹھانے کے لیے صوبائی اور قومی اسمبلی کے فورمز استعمال کیے، تاہم ان کے مطابق ان کی بات نہیں سنی گئی۔ انہوں نے کہا کہ احتجاج کرنا ان کا جمہوری حق ہے اور 27 ستمبر کو پوری طاقت کے ساتھ پرامن طریقے سے نکلیں گے، وزراء کو حراست میں لیے جانے سے بھی تحریک نہیں رکے گی، جبکہ احتجاج کا تفصیلی پلان 25 ستمبر کو سامنے لایا جائے گا۔

وزیراعلیٰ نے کہا ہے کہ تحریک انصاف پرامن راستہ اختیار کرے گی اور جو شخص انتشار پھیلائے گا وہ ان کے مطابق تحریک کا حصہ نہیں ہوگا۔ انہوں نے شہداء کے جنازوں پر سیاست نہ کرنے کی اپیل کرتے ہوئے کہا کہ فوجی اور پولیس اہلکار ملک کے وجود کا حصہ ہیں اور ان پر سیاست نہیں ہونی چاہیے۔ اسد قیصر نے کہا کہ آل پارٹیز کانفرنس میں تمام جمہوری جماعتوں کو دعوت دی جائے گی، جبکہ اس سے قبل اجلاس میں صوابی میں دھرنا دینے کی تجویز بھی سامنے آئی اور 26 ستمبر کو دوبارہ اجلاس طلب کرنے کا فیصلہ کیا گیا۔