روس سے ڈیزل کی پہلی کھیپ امریکا روانہ

واشنگٹن: (ویب ڈیسک) روس سے ڈیزل کی پہلی کھیپ امریکی منڈی کی جانب روانہ ہوگئی ہے۔ یہ پیش رفت امریکی صدر ڈونلڈ ٹرمپ اور روس کے درمیان ڈیزل کی برآمدات سے متعلق معاہدے کے بعد سامنے آئی ہے۔ خبر رساں ادارے رائٹرز کے مطابق شپنگ ڈیٹا میں روسی ڈیزل سے بھرے ایک ٹینکر کی نیویارک کی جانب نقل و حرکت ظاہر ہوئی ہے، تاہم جہاز کی انتظامی کمپنی ایسٹ میڈ نے کہا ہے کہ جہاز تاحال احکامات کا منتظر ہے اور اس کی حتمی منزل طے نہیں ہوئی۔

شپنگ ریکارڈ کے مطابق مالٹا کے پرچم بردار درمیانے سائز کے بحری جہاز ’ایگیوئی فینینڈس‘ میں روسی بندرگاہ پرائمورسک سے 22 اکتوبر کو 40 ہزار میٹرک ٹن انتہائی کم سلفر والا ڈیزل لادا گیا تھا، جس کی امریکا آمد 7 نومبر کو متوقع بتائی گئی ہے۔ کریملن کے ترجمان دمتری پیسکوف نے جمعے کو تصدیق کی کہ معاہدے کے تحت پہلا جہاز روانہ ہوچکا ہے، تاہم انہوں نے اس کی منزل امریکا ہونے کی تصدیق نہیں کی۔ روسی نائب وزیراعظم الیگزینڈر نوواک کے مطابق مزید کھیپوں کی ترسیل بھی ہوگی، جبکہ ترکیہ اور برازیل کے لیے ڈیزل کی سپلائی بھی دوبارہ شروع ہوگئی ہے۔

رپورٹ کے مطابق ٹرمپ نے ڈیزل کی بڑھتی قیمتوں میں کمی لانے کی کوششوں کے تحت روس کے ساتھ یہ معاہدہ کیا اور امریکی پابندیوں کے قانون کے بعض حصوں سے چھوٹ بھی دی گئی۔ روسی صدر کے خصوصی ایلچی کریل دمتریئیف نے دعویٰ کیا کہ امریکی محکمہ خزانہ نے ادائیگیوں کے معاملات حل کرنے کے لیے روسی خودمختار دولت فنڈ سے مدد طلب کی، تاہم اس معاملے سے واقف ایک ذریعے نے اس دعوے کی تردید کی ہے۔ نوواک کے مطابق روس رواں سال کے اختتام تک ڈیزل کی برآمدات کو ماہانہ 30 سے 35 لاکھ میٹرک ٹن کی معمول کی سطح تک بڑھانے کی صلاحیت رکھتا ہے۔

#InternationalNews
#30thOct2026
#Russia
 #UnitedStates
 #DieselExports
 #OilTrade 
#Trump
 #GlobalEnergy
#TVN
#News
#TVNUrdu
#TVNWorld
#TheViewsNetwork