انگلش ویمن کرکٹر کا نیا اعزاز

لگاتار میچز میں وکٹیں لینے کا ریکارڈ، سوفی ایکلسٹون لگاتار 34 میچز میں وکٹیں لینے والی پہلی کرکٹر بن گئیں، اگلے میچ میں مزید وکٹ لینے پر مرلی دھرن کا ریکارڈ ٹوٹ جائے گا۔

لندن: (اسپورٹس ڈیسک) انگلینڈ کی ویمنز کرکٹر سوفی ایکلسٹون نے بین الاقوامی کرکٹ کی تاریخ میں اہم کارنامہ سر انجام دیدیا۔ انگلش ویمن کرکٹر مسلسل سب سے زیادہ اننگز میں وکٹ لینے والے بالرز کی ایلیٹ لسٹ میں متھیا مرلی دھرن اور ڈینس للی سے محض ایک میچ دور رہ گئی ہیں۔ اگر سوفی ایکلسٹون آئندہ ہونے والے میچ میں وکٹ حاصل کرلیتی ہیں تو وہ مسلسل 35 اننگز میں مسلسل وکٹیں لینے والی پہلی ویمن کرکٹر جبکہ بالرز کی فہرست میں لیجنڈ سری لنکن اسپنر مرلی دھرن اور ڈینس للی کو بھی پیچھے چھوڑ دیں گی۔

ریکارڈ کے مطابق مسلسل سب سے زیادہ اننگز میں وکٹیں لینے کا ریکارڈ بشن سنگھ بیدی کے پاس ہے۔ انہوں نے لگاتار 46 اننگز میں وکٹیں حاصل کیں، نیپال کے اسپنر سندیپ لامیچانے دوسرے نمبر پر موجود ہیں۔ انہوں نے 43 مرتبہ یہ کارنامہ سرانجام دیا جبکہ مرلی دھرن اور ڈینس للی نے 35، 35 مرتبہ وکٹیں حاصل کی تھیں۔

انگلش ویمن کرکٹر سوفی ایکلسٹون 34 لگاتار میچوں میں وکٹیں لیکر فہرست میں آخری پوزیشن پر موجود ہیں۔ دوسری طرف انگلینڈ ویمنز ٹیم نے نیوزی لینڈ ویمنز ٹیم کو 5ویں ٹی 20 میچ میں 20 رنز سے شکست دے کر سیریز میں وائٹ واش کر دیا۔ لندن میں کھیلے گئے ٹی 20 سیریز کے 5ویں اور آخری میچ میں نیوزی لینڈ کی ٹیم ہدف کے تعاقب میں 8 وکٹوں کے نقصان پر مقررہ اوورز میں 135 رنز بنا سکی۔