پاک انگلینڈ ٹیسٹ سیریز کا نظرثانی شدہ شیڈول جاری

انگلینڈ کرکٹ ٹیم کا دورہء پاکستان، پہلا ٹیسٹ میچ ملتان اسٹیڈیم میں کھیلا جائے گا، 3 ٹیسٹ میچوں کی سیریز 7 سے 28 اکتوبر تک شیڈول ہے۔

لاہور: (اسپورٹس ڈیسک) پی سی بی کی جانب سے پاک انگلینڈ ٹیسٹ سیریز کے نظرثانی شدہ شیڈول کا اعلان کر دیا گیا ہے۔ ابتدائی 2 ٹیسٹ میچز ملتان اسٹیڈیم میں کھیلے جائیں گے۔ 3 ٹیسٹ میچوں کی سیریز کا دوسرا میچ اصل میں کراچی کے نیشنل سٹیڈیم میں 15 سے 19 اکتوبر تک پلان کیا گیا تھا۔

پی سی بی اعلامیے کے مطابق دوسرا ٹیسٹ میچ کراچی کے بجائے اب ملتان میں 15 سے 19 اکتوبر تک کھیلا جائے گا۔ بقیہ دونوں ٹیسٹ پہلے سے طے شدہ پروگرام کے مطابق ہی کھیلے جائیں گے۔ پاکستان اور انگلینڈ کے درمیان پہلا ٹیسٹ 7 سے 11 اکتوبر تک ملتان میں اور تیسرا ٹیسٹ 24 سے 28 اکتوبر تک راولپنڈی میں ہوگا۔

پی سی بی کے ڈائریکٹر انٹرنیشنل عثمان واہلہ کے مطابق انگلینڈ کرکٹ ٹیم پاکستان دوبارہ آنے کیلئے پرجوش ہے۔ سیریز شیڈول میں معمولی ایڈجسٹمنٹ کے باوجود شائقین کرکٹ کیلئے یادگار ہوگی۔ دوسرے ٹیسٹ میچ کو کراچی سے ملتان منتقل کرنے کی وجہ اگلے سال ہونے والی آئی سی سی چیمپئنز ٹرافی 2025ء کے میچ کیلئے نیشنل اسٹیڈیم میں بڑے پیمانے تعمیراتی پر کام جاری ہیں۔