شمالی وزیرستان میں بارودی سرنگ پھٹنے سے پاک فوج کے 2 جوان شہید

علاقے میں دہشت گردوں کے خاتمے کیلئے سرچ آپریشن جاری، پاک فوج کی جوابی کارروائی سے دہشتگردوں کا بھاری نقصان، صدر مملکت نے پاک فوج کے جوانوں کی شہادت پر گہرے دکھ کا اظہار کیا ہے۔

میرانشاہ: آئی ایس پی آر کے مطابق شمالی وزیرستان کے علاقے عیشام میں بارودی مواد پھٹنے سے پاک فوج کے 2 جوان شہید ہو گئے ہیں۔ علاقے میں دہشت گردوں کے خاتمے کیلئے سرچ آپریشن جاری ہے۔ شہید ہونے والے اہلکاروں کے نام جاوید اقبال (نائب صوبیدار) اور نائیک حسین احمد ہیں۔

پاک فوج کے شعبہ تعلقات عامہ کے مطابق شہید ہونے والے اہلکار نائب صوبیدار جاوید اقبال کا تعلق اٹک سے ہے جبکہ نائیک حسین احمد کا تعلق اوکاڑہ سے بتایا گیا ہے۔ واضح رہے کہ اس سے قبل 20 ستمبر کو بھی شمالی وزیرستان میں افغانستان سے دہشت گردوں نے فائرنگ کر کے پاک فوج کے ایک جوان کو شہید کردیا تھا جس کے بعد پاک فوج کی جوابی کارروائی سے دہشتگردوں کو بھی بھاری نقصان کا سامنا کرنا پڑا تھا۔

صدر مملکت ڈاکٹر عارف علوی نے شمالی وزیرستان میں پاک فوج کے جوانوں کی شہادت پر گہرے دکھ کا اظہار کیا ہے۔ صدر مملکت نے شہداء کے بلند درجات اور اہلِ خانہ کیلئے صبر جمیل کی دعا کی ہے۔ ڈاکٹر عارف علوی نے کہا کہ وطن کی حفاظت میں جام شہادت نوش کرنے والے شہداء قوم کے محسن ہیں۔