لیبیا کے سیلاب متاثرین عالمی امداد کے منتظر

اقوام متحدہ کے انڈر سیکریٹری برائے انسانی امور کی جنیوا میں نیوز کانفرنس، تباہ شدہ عمارتوں میں پھنسے ہوئے افراد کو باہر نکالنے کیلئے ساز و سامان کی اشد ضرورت ہے، سیلاب سے اب تک ہزاروں افراد ہلاک اور ہزاروں لاپتہ ہیں، طوفان اور سیلاب کے باعث لیبیا میں نقل و حمل اور مواصلات کا نظام بری طرح متاثر ہوا ہے۔ 

جنیوا: (ویب ڈیسک) اقوام متحدہ نے لیبیا میں سیلاب سے متاثر ہونے والے افراد کیلئے ہنگامی امداد کی اپیل کر دی ہے۔ اقوام متحدہ کے انڈر سیکریٹری برائے انسانی امور اور ہنگامی امداد مارٹن گریفتھس نے جنیوا میں ایک پریس کانفرنس کی ہے۔ انہوں نے اپنے خطاب میں کہا کہ لیبیا کے متاثرہ علاقوں میں لوگوں کیلئے خوراک اور پناہ گاہوں کی اشد ضرورت ہے۔ 

مارٹن گریفتھس کا کہنا تھا کہ متاثرہ علاقوں میں طبی نظام قائم کرنے کی ضرورت ہے کیونکہ متاثرہ علاقوں میں ہیضے کی وباء پھیلنے کا خدشہ ہے۔ انہوں نے کہا کہ اقوام متحدہ کے امدادی کارکن ہزاروں متاثرین کو ضروری امداد پہنچانے کیلئے کام کر رہے ہیں۔ خیال رہے کہ گزشتہ پیر کے روز لیبیا میں آنے والے سیلاب نے تباہی مچا دی ہے۔ 

مشرقی لیبیا میں آنے والے سیلاب سے اب تک ہزاروں افراد ہلاک اور ہزاروں لاپتہ ہو گئے ہیں۔ سیلاب سے نقل و حمل اور مواصلات کا نظام درہم برہم ہو گیا ہے۔ غیر ملکی میڈیا ذرائع کے مطابق بحیرہ روم سے اٹھنے والے طوفان کے بعد شدید سیلاب سے لیبیا میں وسیع پیمانے پر نقصانات ہوئے ہیں۔ واضح رہے کہ رواں سال کے دوران موسمیاتی حادثات، جنگلوں میں تباہ کن آگ اور موسمی شدت کے ریکارڈ توڑ واقعات پیش آئے ہیں۔