شمالی کوریا کی امریکا کو تائیوان کے معاملے پر سخت وارننگ
سئیول: (ویب ڈیسک) شمالی کوریا نے تائیوان کے معاملے پر امریکا کو خبردار کرتے ہوئے کہا ہے کہ واشنگٹن کی جانب سے تائیوان کو اسلحے کی فراہمی اور فوجی تعاون خطے میں کشیدگی بڑھا رہا ہے۔ سرکاری میڈیا کے مطابق پیانگ یانگ نے امریکی پالیسی کو آبنائے تائیوان کے امن و استحکام کیلئے نقصان دہ قرار دیا ہے۔ شمالی کوریا نے تائیوان میں امریکہ کی جانب سے فراہم کردہ جنگی طیاروں کی موجودگی پر بھی شدید اعتراض کیا ہے۔
شمالی کوریا کے بین الاقوامی امور کے تجزیہ کار کم میونگ چول نے کہا کہ تائیوان کے حوالے سے امریکی اقدامات خطے میں عدم استحکام کو مزید بڑھا رہے ہیں۔ ان کے مطابق واشنگٹن کو سوچنا چاہیے کہ آیا وہ تائیوان کی سلامتی کے نام پر چین جیسی بڑی طاقت کے ساتھ براہِ راست محاذ آرائی کے نتائج برداشت کرنے کیلئے تیار ہے۔ پیانگ یانگ نے اس تناظر میں امریکا کو محتاط رویہ اختیار کرنے کا واضح پیغام دیا ہے۔
دوسری جانب شمالی کوریا کے رہنما کم جونگ اُن نے روس کیلئے اپنی حمایت جاری رکھنے کے عزم کا بھی اظہار کیا ہے، جس سے پیانگ یانگ، ماسکو اور واشنگٹن کے درمیان بڑھتی ہوئی عالمی کشیدگی کی ایک نئی تصویر سامنے آتی ہے۔ تائیوان کے معاملے پر شمالی کوریا کا کھل کر چین کے مؤقف کے قریب آنا مشرقی ایشیا کی جغرافیائی سیاسی صف بندی کو مزید نمایاں کرتا ہے۔ ماہرین کے مطابق امریکا اور چین کے درمیان تائیوان کے مسئلے پر بڑھتا تناؤ خطے میں مستقبل کی سفارتی اور عسکری صورتحال پر گہرے اثرات مرتب کرسکتا ہے۔