معروفِ زمانہ شاعر منور رانا کی طبیعت انتہائی ناساز

معروف شاعر منور رانا کی طبیعت تشویش ناک ہو گئی۔ منور رانا کو علاج کے لیے ایس جی پی جی آئی، لکھنؤ میں داخل کرایا گیا ہے۔

لکھنؤ: تفصیلات کے مطابق بھارت سے تعلق رکھنے والے معروف شاعر اور مشاعروں میں بے انتہا مقبول منور رانا کی طبیعت خراب ہونے پر انھیں اسپتال داخل کر دیا گیا ہے۔ منور رانا کو علاج کے لیے ایس جی پی جی آئی، لکھنؤ میں داخل کرایا گیا ہے۔ ڈاکٹروں کے مطابق ان کی حالت تشویش ناک ہے اور ان کی سرجری کی جانی ہے، جس کے لیے تیاریاں مکمل کر لی گئی ہیں۔ 

رپورٹ کے مطابق منور رانا گردے کی تکلیف کے باعث ڈائیلاسز پر ہیں اور ان کا علاج دہلی میں چل رہا تھا۔ منگل کے روز ان کی طبیعت اچانک خراب ہو گئی، جس پر ان کے اہل خانہ نے انھیں لکھنؤ کے سنجے گاندھی پوسٹ گریجویٹ انسٹی ٹیوٹ آف میڈیکل سائنسز میں داخل کرا دیا۔ ایمرجنسی وارڈ میں ان کا علاج جاری ہے اور ڈاکٹروں نے فوری آپریشن کا مشورہ دیا ہے۔ 

پی جی آئی کی پبلک ریلیشن آفیسر کسم یادو کے نے کہا کہ منور رانا کو اس سے پہلے دل کا دورہ پڑنے پر بھی یہاں داخل کرایا گیا تھا۔ انھیں گردے کا مسئلہ ہے اور اس کا اثر متعدد اعضا  پر ہو رہا ہے۔ منور رانا کے یہ اشعار زبان زد عام ہیں: 

کسی کو گھر ملا حصے میں یا کوئی دکاں آئی 

میں گھر میں سب سے چھوٹا تھا مرے حصے میں ماں آئی 

سو جاتے ہیں فٹ پاتھ پہ اخبار بچھا کر 

مزدور کبھی نیند کی گولی نہیں کھاتے 

وسعت صحرا بھی منہ اپنا چھپا کر نکلی 

ساری دنیا مرے کمرے کے برابر نکلی