پاکستان میں منکی پاکس وائرس کا ایک اور کیس سامنے آ گیا

ملک بھر میں منکی پاکس وائرس کے کیسز کی تعداد 5 ہو گئی، کویت سے اسلام آباد ائیرپورٹ پہنچنے والا شخص وائرس سے متاثرہ نکلا، مشرق وسطیٰ کے ممالک سے آنے والے مسافروں میں وائرس کی شرح سب سے زیادہ ہے۔

اسلام آباد: (ویب ڈیسک) پاکستان میں منکی پاکس کیسز کی تعداد میں اضافہ ہونے لگا ہے۔ کویت سے اسلام آباد پہنچنے والے 50 سالہ شخص میں منکی پاکس وائرس کی تصدیق ہوئی ہے۔ متاثرہ شخص کو پمز ہسپتال منتقل کر دیا گیا ہے۔

وائرس سے متاثرہ مریض کا تعلق فیصل آباد سے بتایا گیا ہے۔ مریض اس وقت آئسولیشن وارڈ میں داخل ہے، بیماری کا ٹیسٹ منفی آنے کے بعد مریض کو ڈسچارج کر دیا جائے گا۔ واضح رہے کہ 2 روز قبل پاکستان میں ایک خاتون کا ٹیسٹ بھی مثبت آیا تھا۔ ملک بھر ملک میں منکی پاکس کے مصدقہ کیسز کی کُل تعداد 5 ہو گئی ہے۔

پمز کے ترجمان ڈاکٹر حیدر عباسی کے مطابق متاثرہ مریض کا نمونہ پیر کے روز لیا گیا تھا۔ قومی ادارہ صحت نے نمونے کی جانچ کے بعد کیس کے مثبت ہونے کی تصدیق کر دی تھی۔ کیس کی تصدیق کے بعد مریض کے ساتھ رابطے میں آنے والے افراد کا سراغ لگایا جا رہا ہے تاکہ انھیں الگ تھلگ رکھا جائے۔

پاکستان میں ابھی تک مقامی طور پر منتقل ہونے والا کیس رپورٹ نہیں ہوا۔ اب تک رپورٹ ہونے والے تمام کیسز مشرق وسطیٰ کے ممالک سے آنے والے مسافروں کے ہیں۔ وزارت قومی صحت کے ترجمان ساجد شاہ نے کہا کہ وزارت نے پہلے ہی داخلی مقامات پر سخت نگرانی کا حکم دیا ہے تاکہ ممکنہ وائرس کیریئرز کی شناخت کو یقینی بنایا جا سکے۔