یوٹیوب پر گیمنگ فیچر کی آزمائش

یوٹیوب نے "پلے ایبلز" کو زیرِ آزمائش فیچر کی فہرست میں شامل کر لیا، ان گیمز کو یوٹیوب ہسٹری میں بھی دیکھا جاسکے گا، ملازمین کی جانب سے جن گیمز کی آزمائش کی گئی تھی ان میں سے ایک اسٹیک باؤنس ہے جو گوگل کے گیم اسنیکس پلیٹ فارم پر موجود ہے۔

کیلیفورنیا: (ٹیکنالوجی ڈیسک) تفصیلات کے مطابق ویڈیو شیئرنگ پلیٹ فارم یوٹیوب نے اپنے "پلے ایبلز" فیچر کی آزمائش شروع کر دی ہے۔ یہ فیچر فی الوقت مخصوص صارفین کیلئے فراہم کیا گیا ہے۔کمپنی کی جانب سے مخصوص صارفین ڈیسک ٹاپ یا موبائل پر ویب سائٹ یا ایپ استعمال کرتے ہوئے گیم کھیل سکیں گے۔

جن صارفین کو اس فیچر تک رسائی حاصل ہو گی انھیں یوٹیوب پر "پلے ایبلز" نامی خانہ نظر آئے گے۔ یہ گیمز فیڈ پر موجود دیگر کونٹینٹ کے ساتھ بھی دِکھائی دیں گی۔ ان گیمز کو یوٹیوب ہسٹری میں بھی دیکھا جاسکے گا اور صارفین گیم کو محفوظ بھی کر سکیں گے۔

گوگل کی ایک رپورٹ کے مطابق رواں سال کے ابتداء میں یوٹیوب ملازمین نے پلے ایبلز کو زیرِ آزمائش فیچر کی فہرست میں شامل کر لیا ہے۔ ملازمین کی جانب سے جن گیمز کی آزمائش کی گئی تھی ان میں سے ایک اسٹیک باؤنس ہے جو گوگل کے گیم اسنیکس پلیٹ فارم پر موجود ہے۔ یہ بات معلوم نہیں کہ کیا گیم اسنیکس کے دیگر گیم بھی اس پلیٹ فارم پر شامل ہوں گے یا نہیں۔