مریخ پر آکسیجن پیدا کرنے کا کامیاب تجربہ

وقفے وقفے سے کاربن ڈائی آکسائیڈ کو آکسیجن میں تبدیل کیا گیا، خلاباز زمین سے دور رہتے ہوئے سرخ سیارے پر رہ سکتے ہیں، مریخ پر پہنچنے کے بعد سے مائیکرو ویو سائز کے آلے نے 122 گرام آکسیجن پیدا کی ہے۔

واشنگٹن: (ٹیکنالوجی ڈیسک) تفصیلات کے مطابق سرخ سیارے پر آکسیجن پیدا کرنے کا کامیاب تجربہ کر لیا گیا ہے۔ ناسا کے پریسیورنس رووَر کی مدد سے پہلی بار آکسیجن پیدا کی گئی ہے۔ روور کی مدد سے جتنی آکسیجن پیدا کی گئی ہے اس سے ایک خلاباز 3 گھنٹے تک مریخ پر زندہ رہ سکتا ہے۔

ذرائع کے مطابق رووَر نے فروری 2021ء میں مریخ پر لینڈنگ کی تھی۔ مشین میں نصب آکسیجن پیدا کرنے والی ڈیوائس کی مدد سے 2 سالوں کے دوران وقفے وقفے سے کاربن ڈائی آکسائیڈ کو آکسیجن میں تبدیل کیا گیا ہے۔ مریخ پر پہنچنے کے بعد مائیکرو ویو سائز کے آلے نے 4.3 اونس (122 گرام) آکسیجن پیدا کی ہے۔ 

آکسیجن کی یہ مقدار کتے کے 10 گھنٹے سانس لینے کے برابر ہے۔ اس تجربے کے بعد ناسا نے امید ظاہر کی ہے کہ ایک دن انسانی زندگی سُرخ سیارے پر برقرار رہ سکے گی۔ واشنگٹن میں ناسا ہیڈکوارٹر میں اسپیس ٹیکنالوجی مشن ڈائریکٹوریٹ رُکن سائنسدان ٹرڈی کورٹس نے کہا کہ ہمیں اس ٹیکنالوجی پر فخر ہے جو مقامی وسائل کو مستقبل کے ریسرچ مشنوں کیلئے مفید مصنوع میں تبدیل کر سکتی ہے۔