پودینے کے انسانی صحت پر لامحدود مثبت اثرات

موسمِ گرما میں پودینہ جسم اور دماغ پر تازگی بخش اثرات مرتب کرتا ہے، یہ صحت کے لیے متعدد فوائد کا باعث ہے۔ پودینہ خون میں کولیسٹرول کی سطح کو بھی منظم کرتا ہے۔

جھنگ: (ویب ڈیسک) زمانہ قدیم سے کھانوں میں ذائقے اور خوشبوکیلئے استعمال ہونے والا ’پودینہ‘ انسانی صحت کیلئے بھی کئی طریقوں سے مفید ہے۔ پودینہ یا مینتھا جڑی بوٹی کا تعلق لامیسی خاندان سے ہے جس کی خاصیت اس میں موجود خوشگوار خوشبو ہے۔ اسکی تیز اور تازگی بخش خوشبو اسٹریس کو کم کرکے انسانی جسم اور دماغ کو تروتازہ کرتی ہے۔ 

پودینہ نظامِ ہاضمہ کو فروغ دینے کے لیے ہاضمے کے انزائمز کو متحرک کرتا ہے۔ یہ کھانے میں موجود غذائیت کو جذب کرنے میں بھی مدد کرتا ہے۔ جب جسم غذائی اجزاء کو مناسب طریقے سے جذب کرتا ہے تو میٹابولزم کی رفتار تیزہوتی ہےجو وزن میں کمی کو فروغ دیتی ہے۔ پودینے میں مینتھول ہوتا ہے، یہ ایک خوشبودار ڈیکنجسٹنٹ (decongestant) ہے جو بلغم کو توڑنے میں مدد کرتا ہے، اس سے بلغم کو باہر نکالنا آسان ہوجاتا ہے۔

پودینے کے پتوں میں موجود اینٹی آکسیڈنٹ روسمارینک ایسڈ( rosmarinic acid) جلد میں خون کی گردش کو بہتر بنانے اور جلد کو ہائیڈریٹ کرنے میں فائدہ مند ہے۔ یہ جلد کو فری ریڈیکل نقصان سے بچاتے ہوئے جھریوں اورلکیروں سے چہرے کو محفوظ رکھتا ہے۔ پودینہ کے پتوں میں موجود سیلیسیلک ایسڈ اور وٹامن اے کے فوائد جلد میں سیبم کے تیل کے اخراج کو کنٹرول کرتے ہیں۔