انجیر بے شمار طبی فوائد کا حامل

انجیر تازہ اور خشک دونوں ہی حالتوں میں انتہائی مؤثر، خشک انجیر میں غذائی ریشہ زیادہ ہوتا ہے جو ہاضمے میں مدد فراہم کرتا ہے، انجیر میں موجود پوٹاشیم اور میگنیشیم بلڈ پریشر کو قابو میں رکھتا ہے اور امراض قلب کے خطرے کو کم کرتا ہے۔

اسلام آباد: (ویب ڈیسک) جیسا کہ ہم جانتے ہیں کہ انجیر بے پناہ طبی فوائد کا حامل ہے اور قرآن کریم میں بھی انجیر کا ذکر آیا ہے۔ انجیر تازہ اور خشک دونوں ہی حالتوں میں انتہائی مؤثر ہے۔ اس میں موجود پروٹین، معدنی اجزاء شکر، کیلشیم، فاسفورس، وٹامن اے اور سی کی وافر مقدار پائی جاتی ہے جبکہ وٹامن بی اور ڈی قلیل مقدار میں ہوتے ہیں۔ ان اجزاء کے پیش نظر انجیر ایک انتہائی مفید غذائی دوا کی حیثیت اختیار کر جاتی ہے۔

خشک انجیر میں غذائی ریشہ زیادہ ہوتا ہے جو ہاضمے میں مدد فراہم کرتا ہے، قبض کی شکایت کو دور کرتا ہے اور آنتوں کی باقاعدہ حرکت کو فروغ دیتا ہے۔ خشک انجیر اینٹی اکسیڈنٹس بشمول پولیفینول اور فلیوونائڈز سے بھی بھرپور ہوتے ہیں۔ یہ مرکبات آپ کے خلیوں کو آزاد ریڈیکلز کی وجہ سے پہنچنے والے نقصان سے محفوظ رکھتے ہیں اور دائمی بیماریوں کے خطرے کو بھی کم کرتے ہیں۔ خشک انجیر میں موجود پوٹاشیم اور میگنیشیم بلڈ پریشر کو قابو میں رکھتا ہے اور امراض قلب کے خطرے کو کم کرتا ہے۔

خشک انجیر میں موجود کیلشیم اور فاسفورس ہڈیوں کو مضبوط بناتا ہے۔ اس کا باقاعدگی سے استعمال ہڈیوں کی کثافت کو بہتر بنا سکتا ہے۔ انجیر دانتوں کیلئے بھی بہترین ہے اور یہ دانتوں کو مضبوطی بھی فراہم کرتی ہے۔ انجیر میں موجود فائبر کی وافر مقدار بھوک کے احساس کو کم کرتی ہے جس سے وزن میں بھی واضح کم آتی ہے۔