کالی مرچ کے چھوٹے چھوٹے دانوں میں پوشیدہ کئی بیماریوں کا علاج

کالی مرچ اینٹی آکسیڈینٹ سے بھرپور مصالحہ، کالی مرچ کھانوں کے ذائقے کو دوبالا کر دیتی ہے، شہد اور کالی مرچ کو نیم گرم پانی میں شامل کر کے کھانسی اور بلغم سے نجات حاصل کی جا سکتی ہے۔

اسلام آباد: (ویب ڈیسک) جیسا کہ ہم جانتے ہیں کہ کالی مرچ تقریباً ہر گھر کے باورچی خانے میں موجود ہوتی ہے۔ کالی مرچ ایک تو مختلف کھانوں کے ذائقے کو دوبالا کر دیتی ہے، دوسرا اس میں کئی بیماریوں کا علاج بھی چھپا ہوا ہے۔ کالی مرچ کا روزانہ استعمال انسانی جسم کو کئی دائمی بیماریوں سے بچانے میں اہم کردار ادا کرتا ہے۔

کالی مرچ جسم کی اندرونی سوزش کو دور کرتی ہے۔ موسم کی تبدیلی کے باعث کھانسی اور بلغم کا شکار افراد کالی مرچ کو شہد کیساتھ استعمال کر کے اس تکلیف سے نجات حاصل کر سکتے ہیں۔ کھانسی اور بلغم ایسی امراض ہیں جن کا تقریباً ہر شخص کبھی نہ کبھی شکار ہوتا ہے۔

اگر آپ کو کھانسی اور بلغم کا ایک ساتھ سامنا ہے تو کالی مرچ اور شہد کا استعمال نہایت مفید ثابت ہو سکتا ہے۔ اس کیلئے ایک چمچ شہد کو نیم گرم کر کے اس کے اوپر چٹکی بھر پسی ہوئی کالی مرچ چھڑکیں اور کھا لیں۔ اس کے علاؤہ شہد اور کالی مرچ کو نیم گرم پانی میں شامل کر کے بھی یہی فائدہ حاصل کیا جا سکتا ہے۔