سائنسدان اسٹار فش کی طرح شکل بدلنے والا مادہ تیار کرنے میں کامیاب

اسٹار فش میں خود کو کسی بھی قسم کی جسمانی ساخت میں ڈھالنے کی صلاحیت موجود، تیار کردہ مادہ ایک ہی وقت میں لچکدار اور مستحکم بھی، 4 ڈی خصوصیات کے حامل مادہ کو روبوٹکس، ہوا بازی اور طبی آلات کیلئے مختلف مقاصد میں استعمال کیا جا سکتا ہے۔

بریمن: (ٹیکنالوجی ڈیسک) سائنسدانوں نے اسٹار فش سے متاثر ہو کر شکل بدلنے والا مادہ تیار کر لیا ہے۔ یہ مادہ ایک ہی وقت میں لچکدار اور مستحکم بھی ہے۔ اس مادے کو متعدد شعبوں میں مختلف مقاصد حاصل کرنے کیلئے استعمال کیا جا سکے گا۔ 

ذرائع کے مطابق یہ کارنامہ بائیلوجیکل اسٹرکچر میں پی ایچ ڈی کے طالب علم نے اسٹار فش سے متاثر ہو کر سر انجام دیا ہے۔ پی ایچ ڈی کے طالب علم رامان اور ان کی ٹیم نے ایک ایسا ماڈل تیار کیا ہے جو 4 ڈی خصوصیات کو ظاہر کرتا ہے۔ اس ماڈل کو روبوٹکس، ہوا بازی اور طبی آلات کیلئے مختلف مقاصد میں استعمال کیا جا سکے گا۔

واضح رہے کہ اسٹار فش خود کو کسی بھی قسم کی جسمانی ساخت میں آسانی سے ڈھالنے کی صلاحیت رکھتی ہے۔ یہ صلاحیت اسٹار فش کے پیچیدہ کنکال میں ہے جو کہ متنوع ٹشوز کا ایک پیچیدہ نیٹ ورک ہے۔ رامان کا کہنا ہے کہ ہمارا مقصد اسٹار فش کے پیچیدہ کنکال کے رازوں کو کھولنا اور ان اصولوں کو اسی طرح کی قابل ذکر خصوصیات کے ساتھ ایک ماڈل میں استعمال کرنا تھا۔