پاس کیز کو محفوظ بنانے کیلئے گوگل کی نئی اپڈیٹ

نئی اپ ڈیٹ کے ذریعے بہت سی ڈیوائسز کو پاس کیز سے جوڑنا ممکن، اس سے قبل دوسری ڈیوائس پر پاس کیز کا استعمال کرنے کیلئے صارفین کو کیو آر کوڈ اسکین کرنا پڑتا تھا، یہ ڈیٹا اینڈ ٹو اینڈ انکرپٹڈ ہے اس لئے کسی کیلئے صارف کی معلومات کو چرانا بہت مشکل ہو گا۔

کیلیفورنیا: (ٹیکنالوجی ڈیسک) تفصیلات کے مطابق ٹیکنالوجی کمپنی گوگل اپنے گوگل پاس ورڈ مینیجر کیلئے ایک نئی اپڈیٹ جاری کرنے جا رہی ہے۔ نئی اپ ڈیٹ کے ذریعے صارفین اپنی بہت سی ڈیوائسز کو پاس کیز سے جوڑ سکیں گے۔ نئی اپ ڈیٹ ونڈوز، میک او ایس، لینکس اور اینڈرائیڈ پر گوگل پاس ورڈ مینیجر کے ذریعے پاس کی کو محفوظ کرنے کی سہولت فراہم کرے گی۔

واضح رہے کہ اس سے قبل صارفین اینڈرائیڈ پر گوگل پاس ورڈ مینیجر میں پاس کیز محفوظ تو کر سکتے تھے لیکن مختلف ڈیوائس میں اس کا استعمال محدود تھا۔ دوسری ڈیوائس پر پاس کیز کا استعمال کرنے کیلئے صارفین کو کیو آر کوڈ اسکین کرنا پڑتا تھا۔ نئی اپڈیٹ کے تحت پاس کی خود بخود گوگل پاس ورڈ مینیجر کا استعمال کرتے ہوئے دوسری ڈیوائسز کے ساتھ جڑ جاتی ہے۔ 

کمپنی کے مطابق یہ ڈیٹا اینڈ ٹو اینڈ انکرپٹڈ ہے۔ کسی کیلئے صارف کی معلومات کو چرانا بہت مشکل ہو گا۔ واضح رہے پاس کی پاس ورڈ سے قدرے مختلف ہے۔ پاس کی ایک ڈیجیٹل کریڈینشیل ہے جو صارفین کو پاس ورڈ استعمال کیے بغیر اکاؤنٹ میں سائن ان کرنے کی اجازت دیتی ہے۔