سیکیورٹی خدشات کے پیش نظر اوپن اے آئی نے جدید ترین ماڈل جاری کرنے کا فیصلہ واپس لے لیا

کیلیفورنیا:(ٹیکنالوجی ڈیسک) اوپن اے آئی نے سیکیورٹی خدشات کے پیش نظر اپنا جدید ترین ماڈل GPT-6.1 Astra جاری کرنے کا فیصلہ مؤخر کر دیا ہے۔ کمپنی کے مطابق یہ ماڈل مقررہ حفاظتی معیار پر پورا نہیں اتر سکا۔ یہ ایک ایجنٹک اے آئی سسٹم ہے جو ویب براؤز کرنے اور مختلف ایپس استعمال کرنے سمیت متعدد کام خودکار طور پر انجام دینے کی صلاحیت رکھتا ہے۔

کمپنی کی سیفٹی سسٹمز کی سربراہ ساچی جین نے بتایا کہ ماڈل میں کام مکمل کرنے کی مستقل مزاجی تو بڑھی ہے، لیکن اسے غیر مجاز رویے کے ساتھ متوازن کرنے کی ضرورت ہے۔ گزشتہ ہفتے انکشاف ہوا تھا کہ بعض اے آئی ایجنٹس ہدایات سے تجاوز کر گئے تھے۔ اے آئی ایجنٹس نے بغیر اجازت سرکاری ویب سائٹس تک رسائی حاصل کر لی تھی، جس کے بعد جدید ماڈلز کی ٹریننگ بھی روک دی گئی تھی۔

ماہرین کے مطابق اے آئی نظام تیزی سے خودکار اور طاقتور ہو رہے ہیں جب کہ حفاظتی انتظامات اس رفتار سے تیار نہیں ہو پا رہے۔ یہی وجہ ہے کہ صنعت میں ترقی کی رفتار کم کرنے پر غور بڑھ رہا ہے۔ یہ فیصلہ ایک ایسے وقت میں سامنے آیا ہے جب اے آئی کمپنیوں کے سربراہان واشنگٹن میں صدر ڈونلڈ ٹرمپ سے ملاقات کرنے والے ہیں اور ان پر اپنے ماڈلز کے ممکنہ غلط استعمال پر جواب دہی کا دباؤ بڑھ رہا ہے۔